विश्‍वास नांगरे-पाटीलांनी वाढविले आरोग्यसेवेचे मनोधैर्य ..प्रत्यक्ष भेट देऊन केले कौतुक

नाशिक : आरोग्य विभागातील डॉक्‍टर, आरोग्यसेवक कोरोनाशी थेट सामना करीत आहेत. प्रत्यक्ष सामना असल्याने त्यांचा जीव अधिक धोक्‍यात आहे. त्यामुळे कोरोनाबाधित, संशयितांवर उपचार करणाऱ्या आरोग्य विभागातील या वैद्यकीय अधिकारी, कर्मचाऱ्यांचे मनोबल वाढविण्यासाठी पोलिस आयुक्त विश्‍वास नांगरे-पाटील यांनी जिल्हा रुग्णालयास भेट देऊन त्यांच्या कार्याला सलाम केला. 

संवाद साधत त्यांच्या कामकाजाची माहिती करून घेतली
सहा आठवड्यांपासून शहरात लॉकडाउन आहे. त्यातच नाशिक शहर व जिल्ह्यात कोरोनाबाधित रुग्णांचा आकडा शंभरीपार गेला आहे. त्यामुळे अशा बिकट परिस्थितीत जिल्हा रुग्णालयाचे जिल्हा शल्यचिकित्सक डॉ. सुरेश जगदाळे यांच्या नेतृत्वाखाली वैद्यकीय अधिकारी, अधिसेविका, परिचारिका, वॉर्ड बॉय, चतुर्थश्रेणी कर्मचारी असे सारे आरोग्यसेवक अहोरात्र सेवा देत आहेत. पोलिस आयुक्त विश्‍वास नांगरे-पाटील यांनी थेट जिल्हा रुग्णालयाला भेट देत, रुग्णांची सेवा देणारे वैद्यकीय अधिकारी, आरोग्यसेवक यांच्याशी संवाद साधत त्यांच्या कामकाजाची माहिती करून घेतली.

हेही वाचा > धक्कादायक! "पुढच्या जन्मी आपण एकाच आईच्या पोटी जन्म घेऊ"..चिठ्ठीत कोरोनाची भीती अन्‌ नैराश्‍य ​

कामकाजाचे कौतुक करीत त्यांचे मनोबल वाढविले

या वेळी अतिरिक्त जिल्हा शल्यचिकित्सक डॉ. निखिल सैंदाणे, डॉ. संजय गांगुर्डे, मुख्य प्रशासकीय अधिकारी व्ही. डी. पाटील यांनीही कोरोना कक्षासह जिल्हा रुग्णालयात येणाऱ्या रुग्णांवर सुरू असलेल्या उपचारांची माहिती दिली. नांगरे-पाटील यांनी सिव्हिलमधील वैद्यकीय अधिकारी, कर्मचाऱ्यांच्या कामकाजाचे कौतुक करीत त्यांचे मनोबल वाढविले. त्यांच्या कामकाजासाठी प्रशस्तिपत्रही प्रदान केले. या वेळी उपायुक्त अमोल तांबे यांच्यासह पोलिस अधिकारी, जिल्हा रुग्णालयातील कर्मचारी उपस्थित होते.

हेही वाचा > एक सुशिक्षित डॉक्टर अन् तान्ह्या जुळ्या मुलांची आई आणि आत्महत्या??? गूढ काय?