मला पतीसोबत नाही तुझ्यासोबत राहायचयं..."चल त्याचा काटा काढू"

नाशिक : टाकळी (ता. मालेगाव) येथील संदीप नाना खैरनार (वय 32) या तरुणाचा खून दहा दिवसांनंतर उघडकीस आणण्यात स्थानिक गुन्हे शाखा व तालुका पोलिसांना यश आले. पत्नीने पूर्वाश्रमीच्या प्रियकराच्या मदतीने पतीचा खून केल्याचे चौकशीत निष्पन्न झाले असून, संशयित पत्नी अर्चना (26) व तिचा प्रियकर विलास जगताप (30, रा. चिखलओहोळ, ता. मालेगाव) यांना बुधवारी (ता. 8) अटक करण्यात आली. 

पत्नी निघाली खलनायिका

संशयित अर्चनाचे माहेर चिखलओहोळ येथील आहे. विवाहापूर्वी महाविद्यालयीन जीवनापासून तिचे विलासशी प्रेमसंबंध होते. विवाहानंतर त्यांच्यात दुरावा निर्माण झाला. विलासची पत्नी मृत झाल्यानंतर नऊ महिन्यांपासून तो अर्चनाच्या संपर्कात होता. यातून त्यांच्यात पुन्हा प्रेमसंबंध प्रस्थापित झाले. संदीप हा वाके फाट्याजवळील साईसुमन पेट्रोलपंपावर कामाला होता. त्याला दारूचे व्यसन होते. दारू प्यायल्यानंतर तो पत्नीला त्रास देत असे. विलास सध्या उत्तमनगर (नाशिक) येथे वास्तव्याला होता. त्याने अर्चनाला भ्रमणध्वनी घेऊन दिला होता. 28 डिसेंबरला संदीपने घरी मटण आणले होते. तो घरी येताच त्याला विलास दिसला. त्यातून तिघांमध्ये बाचाबाची झाली. यात विलास व अर्चनाने संदीपचा दोरीने गळा आवळून खून केला. यानंतर पुरावा नष्ट करण्याच्या हेतूने हातपाय बांधून मृतदेह दुचाकीवर टाकून महामार्गावरील वाके शिवारात टाकळी फाट्याजवळ महादू पवार यांच्या शेतालगत फेकून दिला.

हेही वाचा > धरणावर वनभोजन करताना दोन विद्यार्थी गायब...शोध घेतल्यास धक्काच!..

टाकळी येथील घटनेचा दहा दिवसांत उलगडा 

29 डिसेंबरला सकाळी पोलिसांना मृतदेह आढळल्याने खळबळ उडाली होती. मृत संदीपचा भाऊ सचिन खैरनार याच्या तक्रारीवरून तालुका पोलिस ठाण्यात खून करून पुरावा नष्ट करण्याचा प्रयत्न केल्याचा गुन्हा दाखल करण्यात आला होता. स्थानिक गुन्हे अन्वेषण विभाग व मालेगाव तालुका पोलिस ठाण्याच्या पथकाने टाकळी व परिसरात गेले तीन दिवस कसून चौकशी करून हा खून उघडकीस आणला.  

हेही वाचा > नदीवरील पडक्या खोलीत तो 'तिच्यावर' बळजबरीने...सत्य समजल्यावर धक्काच!