चाळिशीनंतर महिला दुय्यम उच्च रक्तदाबाने त्रस्त!..हृदयविकार, अर्धांगवायूची भीती..  

नाशिक : बदलती जीवनशैली आणि सातत्याने वाढत्या ताणतणावामुळे राज्यात उच्च रक्तदाबाच्या रुग्णांची संख्या मोठी आहे. करिअर आणि घर अशा दोन्ही पातळ्यांवर काम करण्याचा अव्यक्त ताण महिलांमध्ये दिसतो. यामध्ये महिलांची संख्या अधिक असून, जवळपास चार ते पाच महिलांमध्ये एकीला रक्तदाबाची समस्या असल्याचे चित्र आहे. रक्तदाब नियंत्रणामध्ये न राहिल्यामुळे किंवा वेळेवर निदान न झाल्यामुळे पक्षाघात, मेंदूला रक्तपुरवठा खंडित होणे, हृदयविकार यासारखी आपत्कालीन वैद्यकीय परिस्थिती निर्माण होऊ शकते. 

पाच टक्के गर्भवतींना उच्च रक्तदाब 
शहरातील अनेक महिला दुय्यम उच्च रक्तदाबाने त्रस्त आहेत. त्यामुळे पूर्वी पन्नाशीनंतर महिलांना रक्तदाबाची समस्या जाणवायची. मात्र, सध्या अतिरिक्त तणावामुळे तिशीतील महिलांनाही या समस्यांना सामोरे जावे लागत आहे. उच्च रक्तदाबाच्या रुग्णांमध्ये चक्कर, भोवळ, हातापायाला मुंग्या येणे, उलटी आल्यासारखे वाटणे, धडधडणे अशी लक्षणे दिसतात. शहरी महिलांमध्ये उच्च रक्तदाबाचे प्रमाण दहा टक्के असून, ग्रामीण महिलांमध्ये हेच प्रमाण सात ते आठ टक्के आहे. गर्भाच्या वारेत किंवा गर्भवेष्टनात पुरेशा रक्तवाहिन्या तयार न झाल्याने गर्भवतींमध्येही उच्च रक्तदाबाची समस्या बघण्यास मिळत आहे. सुमारे पाच टक्के गर्भवतींमध्ये उच्च रक्तदाब आढळतो आणि यातून गंभीर स्थिती उद्‌भवण्याची शक्‍यता असते. 

जीवनशैलीत बदल आवश्‍यक 

उच्च रक्तदाब हा आजार केवळ औषधाने नियंत्रणात राहत नसून, यासाठी जीवनशैलीशी निगडित आहार, व्यायाम आदी बदलही आवश्‍यक आहेत. अनेकदा रुग्ण वर्षांनुवर्षे औषधे घेत राहतात. परंतु त्यांना फारसा फरक पडत नाही. याला चुकीची जीवनशैली हे महत्त्वाचे कारण आहे. त्यामुळे महिलांनी आपल्या जीवनशैलीत बदल करणे आवश्‍यक आहे. 

हेही वाचा >  माझा काय दोष..मी का "नकोशी"? लुकलुकत्या डोळ्याने 'तिने' जणू विचारले...
अशी घ्या काळजी 

- पस्तीशी ओलांडल्यानंतर दरमहा रक्तदाबाची तपासणी करणे आवश्‍यक. 
- उच्च रक्तदाबाचे निदान झाल्यास नियमित तपासणी करावी. 
- उच्च रक्तदाब नियंत्रणासाठी आहाराच्या वेळांचे नियमन, मिठाचे प्रमाण कमी       करायला हवे. 
- दिवसभरात किमान अर्धा तास चालणे किंवा व्यायाम करणे गरजेचे आहे. 

डॉक्‍टरांचा सल्ला आवश्यक

अनेकदा रक्तदाबाची समस्या लक्षात येत नाही. इतर मोठ्या आजारांचे उपचार करताना उच्च रक्तदाबाचे निदान होते. उच्च रक्तदाबाच्या रुग्णांनी मिठाचे सेवन कमी करावे. याचबरोबर वजनदेखील नियंत्रित ठेवण्यासाठी प्रयत्न करावे. वर्षानुवर्षे औषधे न घेता डॉक्‍टरांच्या सल्ल्याने घ्यावीत. - डॉ. राजश्री पाटील  

हेही वाचा >पती व मुलाला "तिचे"अनैतिक संबंध समजले ...शेवटी मुलानेच..