अपघातातील मृत प्रवाशाच्या पत्नीस रक्कम देण्यास टाळाटाळ...भरपाईसाठी महामंडळाची एसटी बसच जप्त 

st bus (action).jpg
st bus (action).jpg

नाशिक : मोटार अपघात नुकसानभरपाईची तब्बल 23 लाखांची रक्कम देण्याचे आदेश निफाड येथील जिल्हा व सत्र न्यायाधीश एस. टी. ढोके यांच्या न्यायालयाने 2018 मध्ये दिल्यानंतरही एस.टी. महामंडळाने थकीत ठेवल्याने लासलगाव बस आगाराची कसारा-लासलगाव बस मंगळवारी (ता. 10) निफाड बसस्थानकावर सायंकाळी सव्वापाचला निफाड न्यायालयाच्या बेलिफांनी प्रवासी तसेच चालक व वाहकास खाली उतरवून बस जप्त केली आणि निफाड न्यायालयाच्या आवारात जमा केली. 

कसारा-लासलगाव बस जप्त...न्यायालयाची कारवाई 
निफाड तालुक्‍यातील कोकणगाव फाटा येथे 27 सप्टेंबर 2015 ला नंदुरबार आगाराच्या बसने पिक-अपला धडक दिल्याने झालेल्या अपघातात तीन जण ठार, तर दोन जखमी झाले होते. अपघातात नरेंद्र धनवटे (रा. दात्याणे, ता. निफाड) मृत्युमुखी झाले होते. त्यांच्या पत्नी सुनीता यांनी निफाड येथील जिल्हा व सत्र न्यायालयात मोटार अपघात नुकसानभरपाई अर्ज दाखल केला होता. त्याची सुनावणी होऊन पतीच्या मृत्यूबद्दल 23 लाख 37 हजार रुपयांची नुकसानभरपाई देण्याचा आदेश दिला होता; परंतु एस.टी. महामंडळाने नुकसानभरपाई रक्कम देण्यास टाळाटाळ चालविली होती. सुनीता धनवटे यांनी भरपाई मिळण्याकरिता निफाड येथील जिल्हा व सत्र न्यायालयात याचिका दाखल केली होती. त्यातही सुनावणीवेळी रक्कम न भरल्याने ऍड. उत्तम कदम व ऍड. संदीप पवार यांनी रक्कम वसुलीकरिता न्यायालयात बस जप्त करून रक्कम वसुली करण्याचा विनंती अर्ज केला होता. त्यानुसार न्यायाधीश एस. टी. ढोके यांनी 7 डिसेंबरला रक्कम वसुलीसाठी बस जप्त करण्याची कारवाई करावी, असे आदेश दिले होते.

ही कारवाई करण्याकरिता निफाड न्यायालयाचे बेलिफ मंगळवारी सायंकाळी सव्वापाचला निफाड बसस्थानकावर पोचले. लासलगाव बस आगाराची कसारा-लासलगाव बस स्थानकावर आली असता सुनीता धनवटे यांच्या 23 लाख 37 हजार रुपयांची नुकसानभरपाई आणि वसुलीकरिता जप्त केली. बेलिफांनी प्रवासी तसेच चालक व वाहकास खाली उतरवून ही बस जप्त करत निफाड न्यायालयाच्या आवारात आणली.  

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com