Fishing Business (file photo)
Fishing Business (file photo)esakal

Dhule Drought News : सोनगीर परिसरात मासेमारी ठप्प; धरणे, तलाव एप्रिलमध्येच कोरडे

Dhule News : परिसरात दुष्काळामुळे चार धरणे व तलाव एप्रिलमध्येच कोरडे पडल्याने यंदा परिसरातील तलाव व धरणांत मासेमारी पूर्णत: ठप्प असून, मच्छीमारांवर बेकारी व उपासमारीचे संकट कोसळले आहे.

सोनगीर : येथे व परिसरात दुष्काळामुळे चार धरणे व तलाव एप्रिलमध्येच कोरडे पडल्याने यंदा परिसरातील तलाव व धरणांत मासेमारी पूर्णत: ठप्प असून, मच्छीमारांवर बेकारी व उपासमारीचे संकट कोसळले आहे. दरम्यान, माशांच्या दरातही वाढ झाली आहे. कमी पाण्यामुळे यंदा धरणात मत्स्यबीज सोडलेच नसल्याने तालुक्यातही बहुतांश मासेमारी बंद आहे.

परिसरात येथील पाझर तलाव, बाभळे (ता. शिंदखेडा)जवळील जामफळ धरण, डोंगरगाव (ता. शिंदखेडा) येथील सोनवद लघु प्रकल्प, देवभाने (ता. धुळे) येथील धरण, बुरझड (ता. धुळे) येथील सातपायरी धरण आहे. येथील पाझर तलाव भरल्यास दररोज एक क्विंटल मासे मिळतात. यंदा पावसाअभावी तलावाचे स्रोत आटले. तलाव पूर्ण कोरडा पडला असून, मासेमारी ठप्प झाली. गेल्या काही वर्षांपासून ही परिस्थिती आहे.

सोनगीरपासून तीन किलोमीटरवर जामफळ धरण असून, दररोज सुमारे दोन क्विंटल मासे मिळत होते. सध्या धरणात केवळ मृत साठा आहे. धरणाचे विस्तारीकरणाचे काम सुरू असल्याने पाणी संचय केला जात नाही. मत्स्यबीज सोडण्यात न आल्याने येथेही मासेमारी ठप्प आहे. डोंगरगाव येथील सोनवद धरणात दोन वर्षांपूर्वी चार लाख मत्स्यबीज सोडले होते.

दररोज सुमारे दीड क्विंटल मासे मिळायचे. गेल्या वर्षी धरणात मृत साठा असल्याने मत्स्यबीज न सोडण्याचा निर्णय येथील कालिका मच्छीमार सोसायटीने घेतला. त्यामुळे तेथेही मासेमारी ठप्प आहे. दरम्यान, सोनवद धरणात मासेमारीवरून कालिका सोसायटी व स्थानिक मासेमार यांच्यात वाद सुरू आहेत. न्यायालयाचा निकाल लागूनही वाद मिटला नाही. (Latest Marathi News)

Fishing Business (file photo)
Dhule News : जिल्ह्यात दोन लाख हेक्टरवर कापसाची लागवड; पावणेचार लाख हेक्टरवर पेरणीचे उद्दिष्ट

देवभाने धरणातही पाण्याअभावी मासेमारी ठप्प आहे. बुरझड येथील सातपायरी धरणात मत्स्यबीज सोडण्यात आले होते. मात्र फारसे मासे मिळाले नाहीत. दररोज ३० ते ४० किलो मासे मिळायचे तेही सध्या बंद आहे. परिसरासाठी दररोज आठ ते दहा क्विंटल मासे आवश्यक आहेत. मासेमारी सुरू असतानादेखील मासे पुरत नाहीत. पाच-सहा क्विंटल रोहू जातीचे मासे हैदराबाद, उकई (गुजरात) येथून, तर समुद्री बाम मुंबईहून धुळे व तेथून परिसरात आणतात.

यंदा परिसरातील धरणांत मिळणारे कटला, आफ्रिका, बोली, कोंबडा मासे, ओले बोंबील, वाव ही चवदार मासळी मिळत नसल्याने खवय्यांना बाहेरील बर्फात आणलेल्या माशांवर अवलंबून राहावे लागत आहे. मासेमारी ठप्प असल्याने परिसरातील सुमारे शंभर मच्छीमारांना बेकारीला तोंड द्यावे लागत असून, काहींनी मिळेल ते काम स्वीकारले आहे.

दरात वाढ

दरम्यान, माशांच्या दरात वाढ झाल्याने ग्राहकांच्या खिशाला भुर्दंड बसत असून, २०० ते २४० रुपये किलो मिळणारे मासे २४० ते २८० रुपये मिळत आहेत. त्यामुळे मटण, चिकनच्या दरातही वाढ झाली आहे.

Fishing Business (file photo)
Dhule Lok Sabha Constituency : काँग्रेसच्या नाराजीनाट्याचा दुसरा अंक सुरू! बंडखोरीबाबत 3 मेपर्यंत टांगती तलवार

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com