Dhule News : टंचाईग्रस्त गावांतील शाळांमध्ये सुटीतही शिजणार पोषण आहार

कापडणे : धुळ्यासह राज्यातील बहुतांश जिल्ह्यांमध्ये दुष्काळी स्थिती आहे. शासनाने मंडळनिहाय दुष्काळ व टंचाईग्रस्त गावेही घोषित केली आहेत. दुष्काळग्रस्त गावांमधील शाळांमध्ये सुटीतही पोषण आहार सुरू ठेवला जातो. यासाठी केंद्राने २०१६ मध्येच राज्यांना सुचविले आहे. (Nutritious food will be cooked even during holidays in schools in drought village)

यानुसार या वर्षीही उन्हाळी सुटीतही पोषण आहार सुरू राहील का, याविषयी चर्चा सुरू आहे. गुरुजींचेही त्याकडे लक्ष लागून आहे. धुळे जिल्ह्यातील धुळे, शिंदखेडा व साक्री तालुक्यात दुष्काळाची अधिक भीषण परिस्थिती आहे. १०७ गावांमध्ये अधिक टंचाईची स्थिती आहे. रोजगाराची परिस्थितीही गंभीर आहे. दुष्काळग्रस्त भागात पाणीटंचाईहीची स्थितीही गंभीर आहे. शासन दुष्काळग्रस्त गावांमध्ये विविध योजना राबवीत असते.

सध्या तरी कोणत्या योजना कार्यान्वित झाल्या आहेत हे समजणे अनाकलनीयच झाले आहे. दुष्काळग्रस्त गावांमधील जिल्हा परिषद शाळांमध्ये उन्हाळी सुटीतही पोषण आहार योजना राबविली जाते. २०१७, २०१८ व २०१९ ही तीन वर्षे सलग पोषण आहार योजना सुटीतही राबविली गेली होती.

या वर्षीही दुष्काळी स्थिती आहे. ही योजना शासन राबविली जाते का, याकडे ग्रामस्थांचे लक्ष लागून आहे. मे महिन्यासाठी आवश्यक धान्यादी साठा पुरविणे आवश्यक आहे, अद्याप पुरविला गेलेला नाही. ही योजना गुंडाळली गेल्याची चर्चा सुरू झाली आहे. (latest marathi news)

सारेच निवडणुकीत व्यस्त

अधिकारी, कर्मचारी, प्रशासन आदी सारेच निवडणुकीच्या कामात व्यस्त आहेत. मे महिना पूर्णतः निवडणुकीतच जाणार आहे. टंचाईग्रस्त गावांमध्ये पोषण आहार योजना राबविली जाईल का, याकडे साऱ्यांचे लक्ष लागून आहे.

२०१९ मध्ये...!

राज्यात २०१९ मध्ये २६ जिल्ह्यांतील १५१ तालुके व २६१ महसुली मंडळांमध्ये भीषण दुष्काळी स्थिती होती. सुमारे ४० हजार २८८ प्राथमिक शाळांमध्ये उन्हाळी सुटीतही पोषण आहार शिजला होता. यासाठी प्रत्येक शाळेवर एप्रिलमध्येच धान्यादी मालाचा पुरवठा झाला होता. २०१७, २०१८ व २०१९ हे तीन वर्षे दुष्काळ होता. सलग तिसऱ्या वर्षी सुटीत पोषण आहार शिजला होता.