Dhule Crime News : देऊर गावात चोरट्यांचा धुमाकूळ

Dhule Crime News : देऊर बुद्रुक येथे रविवारी (ता. ३) मध्यरात्री चोरट्यांनी एकूण सहा घरफोड्या केल्या आहेत. यामुळे येथील ग्रामस्थांमध्ये भीतीचे वातावरण निर्माण झाले आहे. झालेल्या घटनेची माहिती सोमवारी (ता. ४) धुळे तालुका पोलिस विभागाला देण्यात आली असता, तत्काळ धुळे पोलिस विभागातर्फे श्वान पथकास पाचारण करण्यात आले. (Dhule total of six burglaries committed by thieves in middle of night in Deur)

चोरीच्या घटनेत चोरांचे उमटलेले बोटांचे ठसे यांचा नमुना घेण्यात आला. देऊर येथील ग्रामस्थ भटू देवरे घरात एकटे राहात होते. रात्री अकराला नेहमीप्रमाणे खोलीत झोपी गेले असता, त्यांच्या घरातील गोदरेज कपाटाचे कुलूप तोडून एक लाख रुपये चोरल्याचे देवरे यांना सकाळी समजले.

तसेच येथिल ग्रामस्थ राजू खैरनार बाहेरगावी गेले असता, चोरट्यांनी त्यांच्या घरी चोरी केली. भटू देवरे यांनी धुळे तालुका पोलिस ठाण्यात चोरीच्या घटनेची माहिती दिली आहे. तसेच गावातील विजय नेरकर यांच्या बंद घराचे कुलूप तोडून चोरीचा प्रयत्न केला.

परंतु चोरट्यांना हाती काहीही न लागल्यामुळे तेथून बाळू देवरे यांच्या घराची मागील खिडकी चोरट्यांनी तोडून घरात असलेल्या पेटी बाहेर नेऊन तोडफोड केली. राजेंद्र पिंपळे यांच्या घरातील तांब्याचा हंडा, नथूबाई माळी यांच्या घरातून वीस हजार रुपये चोरून नेले. वरील घरमालकांनी झालेल्या घटनेची माहिती धुळे तालुका पोलिस ठाण्यात कळविली नाही.

सकाळी गावात एकूण सहा घरांत चोरी झाल्याची वार्ता पसरली. या वेळी नेर पोलिस दूरक्षेत्राचे पोलिस पदाधिकारी, देऊर गावाचे सरपंच भाऊसाहेब देवरे, पोलिसपाटील सागर भदाणे यांनी घटनास्थळावर भेट देत पाहणी केली. चोरट्यांना तत्काळ जेरबंद करण्याची मागणी देऊरसह परिसरातील ग्रामस्थांनी पोलिस प्रशासनाकडे केली आहे.