नाशिक जिल्हा पोलिस अधीक्षकपदी डॉ. आरती सिंग

नाशिक - नाशिक ग्रामीणच्या पोलिस अधीक्षकपदी औरंगाबादच्या डॉ. आरती सिंग यांची नियुक्ती करण्यात आली आहे. आगामी लोकसभा निवडणुकीच्या पार्श्‍वभूमीवर गेल्या आठवड्यात नाशिकचे पोलिस अधीक्षक संजय दराडे यांची विक्रीकर भवन (मुंबई) येथे विशेष पोलिस उपमहानिरीक्षक म्हणून पदोन्नतीवर बदली झाली. मात्र, त्यांची जागा रिक्त होती. 

डॉ. आरती सिंग औरंगाबाद ग्रामीण पोलिस अधीक्षक म्हणून काम पाहत होत्या. बुधवारी (ता. २७) शासनाच्या गृहविभागाने जारी केलेल्या बदल्यांनुसार नाशिक ग्रामीण पोलिस अधीक्षक म्हणून डॉ. आरती सिंग यांची नियुक्ती झाली. 

याशिवाय धुळ्याचे अपर पोलिस अधीक्षक विवेक पानसरे यांची ठाणे शहरात पोलिस उपायुक्त म्हणून बदली झाली. श्री. पानसरे यांच्या बदलीमुळे गेल्या दहा महिन्यांपासून पदभार स्वीकारण्याच्या प्रतीक्षेत असलेले डॉ. राजू भुजबळ यांची वाट मोकळी झाली आहे. ते आता धुळ्याच्या अपर पोलिस अधीक्षकपदाची सूत्रे घेऊ शकतील.  आगामी लोकसभा निवडणुकीच्या पार्श्‍वभूमीवर गेल्या महिनाभरापासून पोलिस अधिकाऱ्यांच्या बदल्या होत आहेत.