"पावनखिंड' पोवाड्याने अंगावर उभे केले शहारे 

जळगावः  भरारी फाउंडेशनतर्फे पाच दिवसांपासून सुरू असलेल्या बहिणाबाई महोत्सवाचा  उत्साहपूर्ण वातावरणात मंगळवारी समारोप झाला. लोकरंजनातून समाजप्रबोधन व संगीत यात्रा कार्यक्रमाने महोत्सवाचा समारोप झाला. परंतु यात शाहीर सम्राट देवानंद माळी यांनी गायलेल्या "पावनखिंड' पोवाड्याने अंगावर शहारे उभे केले. 

भरारी फाउंडेशनतर्फे 16 ते 21 जानेवारीदरम्यान सागर पार्कवर मैदानावर बहिणाबाई महोत्सवाचे आयोजन करण्यात आले. पाच दिवसीय महोत्सवाचा समारोप मंगळवारी सायंकाळी उत्साहपूर्ण वातावरणात पार पडला. पाच दिवसांच्या बहिणाबाई महोत्सवाचा आज सायंकाळी शाहीर सम्राट देवानंद माळी यांच्या "लोकरंजनातून समाजप्रबोधन' व "संगीत यात्रा' या कार्यक्रमानंतर समारोप झाला. शाहीर सम्राट माळी यांनी सादर केलेल्या "पावनखिंड' पोवाड्याने उपस्थितांच्या अंगावर शहारे आले. त्याचबरोबर महाराष्ट्राचा पोवाडा व शाहीर चंद्रिका कल्पना माळी यांनी "नारीशक्ती पोवाडा' सादर करून उपस्थितांची मने जिंकली. प्रिया सायखेडे (जळगाव) व यश देवले (ग्वाल्हेर) यांनी "संगीत यात्रा' या कार्यक्रमातून अभंग, नाट्यगीत व बहिणाबाईंचे "धन धरतीच्या कुशी मंधी' हे गीत सादर केले. सुरवातीला महोत्सव यशस्वितेसाठी सहकार्य करणाऱ्या व्यक्ती व संस्थांचा सत्कार करण्यात आला. समारोप कार्यक्रमास पोलिस उपमहानिरीक्षक दत्तात्रय कराळे, जिल्हा परिषदेचे मुख्य कार्यकारी अधिकारी डॉ. बी. एन. पाटील, उपविभागीय अधिकारी दीपमाला चौरे, केशवस्मृती प्रतिष्ठानचे भरत अमळकर, नरेश खंडेलवाल, जळगाव जनता सहकारी बॅंकेचे मुख्य कार्यकारी अधिकारी पुंडलिक पाटील, डॉ. रूपेश पाटील यांची उपस्थिती होती. रामचंद्र पाटील यांनी सूत्रसंचालन केले. दीपक परदेशी यांनी आभार मानले. 

हजारो नागरिकांची भेट 
दरवर्षी भरविण्यात येणारा बहिणाबाई महोत्सव यंदाही पाच दिवसांचा राहिला. महोत्सवात असलेल्या बचत गटांच्या स्टॉलवरील वस्तू खरेदी आणि रोज सायंकाळी होणाऱ्या वेगवेगळ्या सांस्कृतिक कार्यक्रमांनी रंग भरला. या कार्यक्रमांसाठी सायंकाळी जळगावकरांची उपस्थिती लाभत होती. त्यामुळे पाच दिवसांच्या महोत्सवात दहा हजारांवर नागरिकांनी भेट दिल्याचा अंदाज आहे.