जळगाव मनपात भाजप-शिवसेना एकत्र येणार 

जळगाव : महापालिकेला भाजप सरकारच्या काळात मुख्यमंत्र्यांनी नगरोत्थान योजनेंतर्गत 100 कोटींचा निधी मंजूर केला होता. या शंभर कोटींतील कामांचे नियोजन करण्यात बराच कालावधी गेल्यामुळे हा निधी खर्च करता आला नाही. याच दरम्यान राज्यात सत्ता परिवर्तन झाले आणि शंभर कोटींच्या कामांच्या निधीला नवीन सरकारने काम सुरू न झाल्यामुळे स्थगिती दिली आहे. ही स्थगिती उठविण्यासाठी शिवसेना व भाजपचे नगरसेवक पालकमंत्री गुलाबराव पाटील यांच्यामार्फत मुख्यमंत्र्यांना विनंती करणार आहेत. महापालिकेच्या महापौरपदी भारती सोनवणे यांनी पदभार घेतल्यानंतर दुसऱ्याच दिवशी शहरातील रस्ते, गटारी, पथदिवे, भूमिगत गटारी, जलवाहिन्या, लिफ्ट आदी विषयांचा अधिकाऱ्यांकडून आढावा घेण्यात आला. यावेळी भाजप गटनेते, भगत बालाणी, नगरसेवक कैलास सोनवणे, किशोर बाविस्कर, नवनाथ दारकुंडे, चेतन सनकत, सेना नगरसेवक प्रशांत नाईक उपस्थित होते. 

शहरातील विविध प्रलंबित प्रश्न सोडविण्यासाठी मंगळवारी दुपारी महापौर भारती सोनवणे यांच्या दालनात अधिकाऱ्यांची आढावा बैठक घेण्यात आली. या बैठकीत अमृत योजनेंतर्गत सुरू असलेल्या जलवाहिनी व भूमिगत गटारींच्या कामाचा आढावा घेण्यात आला. तसेच लवकरात लवकर कामे मार्गी लावण्यासह एकाच वेळी एका भागातील गटारींचे व जलवाहिनीचे काम हाती घेऊन ते पूर्ण करण्याच्या सूचना करण्यात आल्या. तसेच बंद पडलेले एलईडी पथदिवे त्वरित दुरुस्त करून नवीन एलईडी बसविण्याचे काम सुरू करण्याचे आदेश देण्यात आलेत. 

आर्वजून पहा ः मुख्यमंत्र्यांच्या खर्चास भाजप नगरसेवकांचा विरोध