कंडारीतील गृहस्थाचा दगडाने ठेचून खून ;रात्री सोबत मद्यप्राशन करणारा मित्र ताब्यात 

जळगाव, :- जळगाव तालुक्‍यातील कंडारी येथील 40 वर्षीय गृहस्थाचा दगडाने ठेचून खून केल्याची घटना सकाळी उघडकीस आली. तुषार प्रभाकर सुर्वे(वय-41) असे मयताचे नाव असून गावाच्या बाहेर असलेल्या खळ्यात रक्ताच्या थारोळ्यात तुषारचा मृतदेह दिसून आल्याने गावात एकच खळबळ उडाली. नशिराबाद पोलिसांसह गुन्हेशाखेने धाव घेतली असून तीन संशयितांना चौकशीसाठी ताब्यात घेण्यात आले आहे. 

कंडारी (ता.जळगाव) येथील तुषार ऊर्फ अप्पा प्रभाकर सुर्वे (वय-41 रा. कंडारी) आणि रायपूर येथील उपसरपंच वसंत सीताराम धनगर दोघांनी खळ्यात बुधवारी रात्री मद्यप्राशन केले. पोलिसांनी केलेल्या चौकशीत तुषार खळ्यात रखवालीसाठी झोपला होता तर वसंत धनगर यांचे वाघुर धरणाजवळ घर आहे. रात्री साडे आठ वाजेपर्यंतच आपण सोबत होतो, असे त्यांनी प्राथमिक चौकशीत पोलिसांना सांगितले आहे. नेरी-गाढेगाव रस्त्यावर तुषार यांचे शेत व खळे आहे. त्यानंतर सकाळी तुषारचा मृतदेहच आढळून आला. तुषार हा खळ्यात पलंगावर मृतावस्थेत पडलेल्या असल्याची माहिती प्रल्हादराव शिवाजी देशमुख यांनी कुटुंबाला कळविली. 

घटनास्थळी पोलिसांची धाव 
घटनेची माहिती कळताच अपर पोलिस अधीक्षक भाग्यश्री नवटके, भुसावळ उपविभागीय पोलिस अधिकारी गजानन राठोड, स्थानिक गुन्हे शाखेचे निरीक्षक बापू रोहोम, नशिराबाद पोलिस स्टेशनचे सहायक निरीक्षक प्रवीण साळुंखे, सचिन कापडणीस, विजयसिंग पाटील, नरेंद्र वारुळे, दर्शन ढाकणे, प्रवीण ढाके, सतीश पाटील, राजू सोळंखे व किरण बाविस्कर यांनी घटनास्थळी धाव घेतली. 

गुन्हा दाखल 
मृताची पत्नी मनीषा यांच्या फिर्यादीवरून नशिराबाद पोलिस ठाण्यात अज्ञात व्यक्तीविरुद्ध खुनाचा गुन्हा दाखल करण्यात आला आहे. तुषार याच्या पश्‍चात पत्नी मनीषा, मुलगा ओम, वडील प्रभाकर भाऊराव सुर्वे, भाऊ हेमंत असा परिवार आहे.