अंगणात सरडा फेकल्‍याचा संशय; वहिनीवर कुऱ्हाडीने वार

तळोदा (नंदुरबार) : मेलेला सरडा घरासमोरील रस्त्यावर टाकल्याच्या राग येत गढावली (ता. तळोदा) येथील सुभाष पवार याने चक्क वहिनी सुपडीबाई पवार हिच्यावर कुऱ्हाडीने (Crime news) वार करत गंभीर जखमी केले. जखमी सुपडीबाई पवार हिच्यावर शहादा येथील रुग्णालयात उपचार करण्यात येत आहे. याबाबत तळोदा पोलीस ठाण्यात (Taloda police) गुन्हा दाखल करण्यात आला आहे. (crime news attacked with an ax)

पोलीसात फिर्यादी सुपडीबाई किसन पवार (वय ३५, रा. गढावली ता. तळोदा) व आरोपी सुभाष वाऱ्या पवार (वय ३०) यांचे समोरासमोर घर आहे. सुपडीबाई पवार व सुभाष पवार यांच्यात वहिनी- दिराचे नाते असून ते एकमेकांच्या घरासमोर राहतात. बुधवारी (ता. १९) सुभाष पवार यांना आपल्या घरासमोरील रस्त्यावर मेलेला सरडा दिसला. सुपडीबाई पवार यांनीच मेलेला सरडा रस्त्यावर टाकला असे गृहीत धरुन मागील भांडणाची कुरापत काढत सुभाष पवार याने सुपडीबाई पवार यांना मारहाण करीत त्यांच्यावर कुऱ्हाडीने वार केले.

जखमी अवस्‍थेत नेले रूग्‍णालयात

सुपडीबाई पवार यांच्या डोक्यात, बगल, हात व छातीवर गंभीर जखमा झाल्या आहेत. जखमी सुपडीबाई पवार यांना तळोद्यातील उपजिल्हा रुग्णालयात दाखल करण्यात आले. तिथे त्यांच्यावर औषधोपचार करीत पुढील उपचारासाठी त्यांना नंदुरबार येथील जिल्हा रुग्णालयात दाखल करण्यात आले होते. सध्या सुपडीबाई पवार यांच्यावर शहाद्यातील रुग्णालयात उपचार करण्यात येत असून त्यांच्या फिर्यादीवरुन आरोपी सुभाष पवार यांच्याविरोधात तळोदा पोलीस ठाण्यात गुन्हा दाखल करण्यात आला आहे. पुढील तपास सहाय्यक पोलीस निरीक्षक अविनाश केदार करीत असून आरोपी सुभाष पवार यांना ताब्यात घेण्यात आले आहे.