राज्यातील शिक्षक, शिक्षकेतर कर्मचाऱ्यांचे पगार रखडले

न्याहळोद (धुळे) : दोन महिन्यांपासून शिक्षण विभागाच्या दिरंगाईमुळे व बेपर्वाईमुळे राज्यभरातील शिक्षक, शिक्षकेतरांचे पगार उशिरा होत आहेत. गुढी पाडवा सण गेला, आज राम नवमी आहे. आणि रमजानचा पवित्र महिनाही सुरु झालेला आहे. महिन्याची २० तारीख उलटून गेली तरी अद्याप पगार झालेले नाहीत. शिक्षण विभाग आणि वित्त विभाग यांच्यामध्ये समन्वय नसल्याने पैसे येऊनही वित्त विभागाने बिले नाकारली आहेत. शिक्षण सचिवांना हटविण्याची मागणी शिक्षक भारतीचे कार्याध्यक्ष सुभाष मोरे यांनी केली आहे.

मागील महिन्यात शिक्षण विभागाने वित्त विभागाकडे वेळेत पैसे न मागितल्यामुळे पगार उशिरा झाले होते. आमदार कपिल पाटील यांनी वित्त सचिवांना भेटून हा प्रकार समोर आणला होता. त्यानंतर हालचाली होऊन फेब्रुवारीचे पगार झाले. तरी सुद्धा अद्यापही काही जिल्ह्यात फेब्रुवारीचे पगार झालेले नाहीत. मार्च पेड इन एप्रिल पगार न होण्यासाठी अनेक तांत्रिक बाबी सांगितल्या जात आहेत. मात्र या सर्वांचा फटका शिक्षक, शिक्षकेतर कर्मचाऱ्यांना बसत आहे. कोविड काळात अनेक ठिकाणी शिक्षक, शिक्षकेतरांचे मृत्यू झालेले आहेत. अनेकजण कोविडग्रस्त असून उपचारासाठी मोठा खर्च होत आहे.

शिक्षण विभागाकडून दिरंगाई

कर्जाचे हप्ते थकलेत. दंड, व्याज भरावे लागत आहे. आणि या सगळ्या परिस्थितीत शिक्षण विभाग मूक गिळून बसलेला आहे. आमदार कपिल पाटील यांनी शिक्षण विभागातल्या या दिरंगाईवर आणि शिक्षण विभागातले अधिकारी काम करत नाहीत, याबद्दल आवाज उठवला. तेव्हा शिक्षण सचिवांनी विधान परिषदेच्या सभापतींकडेच आमदार कपिल पाटील शिक्षकांच्या हिताच्या निर्णयांसाठी दबाव टाकतात, अशी तक्रार केली आहे. अशा प्रकारची वागणूक करणाऱ्या शिक्षण सचिवांनाच हटवा अशी मागणी शिक्षक भारतीने केली आहे.

तर आंदोलन छेडणार

मुंबईतील शिक्षकांच्या पगाराबाबत सुप्रीम कोर्टने यापूर्वीच निर्णय दिलेला आहे. परंतु शिक्षक भारतीने याबाबत वारंवार पाठपुरावा करूनही शिक्षण विभागाकडून त्याची अंमलबजावणी न झाल्यामुळे युनियन बँक ऑफ इंडियाला निधी वितरणाची अडचण येत आहे. यासर्व प्रश्नांबाबत उद्या आमदार कपिल पाटील, उपमुख्यमंत्री तथा वित्तमंत्री अजित पवार यांना भेटून सर्व परिस्थिती सांगणार आहेत, अशी माहिती मोरे यांनी दिली. शिक्षकांचे पगार वेळेवर न झाल्यास धुळे जिल्हा शिक्षक भारतीतर्फे आंदोलन छेडण्यात येईल असा इशारा शिक्षक भारती संघटनेचे प्र धुळे जिल्हा अध्यक्ष आबासाहेब पाटील, विनोद रोकडे, खेमचंद पाकळे, किरण मासुळे, सुधाकर पाटील, रणजित शिंदे, संजय पाटील, अमीन कुरेशी, कैलास अमृतकर, जयवंत पाटील, विजय सूर्यवंशी, रावसाहेब चव्हाण, अशपाक खाटीक, मुश्ताक शेख इत्यादींनी दिला आहे.