पतीचा मृतदेह घेऊन पत्नीचा न्यायासाठी लढा ! 

भुसावळ : दीपनगर प्रकल्पातील कॅंण्टीनमध्ये चहा घेण्यासाठी गेलेल्या कर्मचाऱ्यास सुरक्षा रक्षकांनी केलेल्या बेदम मारहाणीत त्याचा जागीच मृत्यू झाला. सोमवारी रात्री साडेअकराच्या सुमारास घडली घडली असून पतीचा मृतदेह घेवून पत्नीसह नातेवाइकांनी दीपनगर प्रवेशद्वारासमोर ठिय्या मांडला. जोपर्यंत न्याय मिळत नाही; तोपर्यंत मृतदेह उचलणार नसल्याची भुमिका घेतली आहे. 

आवर्जुन वाचा -  नववधूचे माहेरच हिरावले....जिथे लागले लग्न तिथूनच निघाल्या अंत्ययात्रा

फेकरी (ता. भुसावळ) येथील रहिवासी प्रवीण नामदेव बऱ्हाटे यांच्या मुलीचे आज (ता. 4) लग्न होते. यासाठी रात्रीच स्वयंपाकाची तयारी सुरु होती. स्वयंपाकासाठी आलेले हलवाई व इतर मजूरांसाठी रात्री साडेदहाच्या सुमारास चहा घेण्यासाठी संजय बळीरात बऱ्हाटे (वय 46, रा. फेकरी ता. भुसावळ) हे दीपनगर औष्णिक विद्युत केंद्राच्या कॅण्टीनमध्ये जात होते. यावेळेस त्यांना गेट क्रमांक 210 जवळ उभे असलेल्या खासगी सुरक्षा रक्षक कर्मचारी सागर मोरे, योगेश (नाव पूर्ण समजू शकले नाही), राजेश बनसोडे यांनी धक्काबुक्की केली. त्यानंतर संजय बऱ्हाटे यांना तिघांनी बेदम मारहाण केली. तर कायमस्वरूपी नियुक्त असलेल्या सुरक्षा अधिकारी लोकरे यांनीही शिवीगाळ करून मारहाण करण्यास सुरूवात केली. यात संजय बऱ्हाटे यांचा जागीच मृत्यू झाला. ही घटना घडल्यानंतर तिघे खासगी सुरक्षा रक्षक फरार झाले. नातेवाईकांनी घटनास्थळी धाव घेवून तातडीने भुसावळातील खासगी रूग्णालयात दाखल केले असता डॉक्‍टरांनी मृत घोषीत केले. 

चार तास केला ठिय्या 
सुरक्षा रक्षकांनी केलेल्या मारहाणी संजय बऱ्हाटे यांचा मृत्यू झाला. यामुळे पत्नीने नातेवाईकांसह पतीचा मृत्यदेह घेवून दीपनगर औष्णीक विद्युत केंद्र गाठले. प्रवेशद्वाराजवळ पतीचा मृतदेह ठेवून न्यायासाठी याचना केली. जोपर्यंत न्याय मिळणार नाही, तोपर्यंत मृतदेह उचलणार नसल्याची भुमिका पत्नी आणि त्यांच्या नातेवाईकांनी घेतली होती.