आयटकचे राज्य अधिवेशन शनिवारपासून,500 प्रतिनिधींचा सहभाग 

नाशिकः ऑल इंडिया ट्रेड युनियन कॉंग्रेस (आयटक) या कामगारांच्या संघटनेचे शनिवारपासून (ता. 24) 18 वे राज्य अधिवेशन श्रीकृष्ण लॉन्स, सिद्धार्थ कामत हॉटेल शेजारी, पुणे रोड येथे होणार आहे. आयटकशी संबंधीत विविध संघटनांचे पाचशे प्रतिनिधी सहभागी होणार आहेत.
 

अधिवेशनात शेतकरी कामगारांच्या चळवळीची एकजुटीवर विशेष सत्र, संघटनेचा राजकीय व संघटनात्मक अहवाल, कवितावाचन तसेच रविवारी (ता. 25) संविधान जागर रॅली आणि राष्ट्रीय महासचिव अमरजीत कौर, दिल्ली यांच्या संविधान जागर सभेने या अधिवेशनाची सांगता होणार असल्याची माहिती आयटकचे राज्यसचिव राजू देसले यांनी दिली. मेघदूत शॉपिंग सेंटर, सीबीएस येथील आयटकच्या कार्यालयात झालेल्या पत्रकार परिषदेत ते बोलत होते. यावेळी अधिवेशनाचे स्वागताध्यक्ष व्ही. डी. धनवटे, राज्यसचिव ज्योती नटराजन, वीज वर्कर्स फेडरेशनचे अरूण म्हस्के, जिल्हा संघटक विजय दराडे, उदय चौधरी, प्रताप भालके, विराज देवांग, माया घोलप उपस्थित होते. 

श्री. देसले म्हणाले, की अधिवेशन स्थळाचे "स्वातंत्र्यसैनिक कॉ. माधवराव गायकवाड नगरी' असे नामकरण करण्यात येणार आहे. शनिवारी (ता. 24) सकाळी भारतीय कम्युनिस्ट पक्षाच्या (भाकप) ज्येष्ठ नेत्या कुसुमताई गायकवाड यांच्या हस्ते झेंडावंदन करण्यात येणार असून सकाळी 10 वाजता भाकपचे राष्ट्रीय सचिव मंडळ सदस्य डॉ. भालचंद्र कांगो यांच्या हस्ते उद्‌घाटन होईल. आयटकचे राज्याध्यक्ष सुकुमार दामले अध्यक्षस्थानी तर स्वागताध्यक्ष म्हणून जिल्हाध्यक्ष व्ही. डी. धनवटे उपस्थित राहतील.