घरांवर लावणार रेडिओ फ्रिक्‍वेन्सी; तंत्रज्ञानावर आधारित वीज मीटर 

जळगाव ः महावितरणच्या जळगाव परिमंडळात पुनर्रचित गतिमान ऊर्जा विकास व सुधारणा कार्यक्रमाअंतर्गत समाविष्ट 14 शहरात रेडिओ फ्रिक्‍वेन्सी तंत्रज्ञानावर आधारित नवीन वीज मीटर बसविण्याचे काम सुरू करण्यात आले आहे. यात खानदेशातील साधारण 3 लाख सहा हजार ग्राहकांच्या घरांवर नवीन मीटर लागणार आहेत. 

ग्राहकांना वीज वापरानुसार अचूक व वेळेत बिले मिळावीत, हा नवीन मीटरप्रणालीचा हेतू आहे. रेडिओ फ्रिक्‍वेन्सी तंत्रज्ञानावर आधारित नवीन वीज मीटरमुळे मानवी हस्तक्षेप रहित मीटर रीडिंग घेतले जाणार असल्याने ग्राहकांच्या वीजवापराची अचूक व वेळेवर नोंद होणार आहे. त्यामुळे ग्राहकांच्या वीजबिलाच्या समस्या असणार नाहीत. सिंगल फेज लघुदाब वर्गवारीतील 3 लक्ष 6 हजार 27 वीज ग्राहकांना हे नवीन मीटर बसविले जाणार आहेत. मीटरच्या उपलब्धतेनुसार मीटर बदलण्याचे काम करण्यात येत आहे. एप्रिलअखेर धरणगावात 2009, भुसावळ 16 हजार 504, पारोळा 2461 व चोपडा 351 नवीन वीज मीटर बसविण्यात आले आहेत. 

परिमंडळातील शहरांचा समावेश 
पुनर्रचित गतिमान ऊर्जा विकास व सुधारणा कार्यक्रमात जळगाव जिल्ह्यातील भुसावळ, चाळीसगाव, पाचोरा, पारोळा, अमळनेर, धरणगाव, एरंडोल, चोपडा, यावल या नऊ शहरांचा समावेश आहे. तर धुळे जिल्ह्यातील धुळे, शिरपूर व दोंडाईचा आणि नंदुरबार जिल्ह्यातील नंदुरबार व शहादा या दोन शहरांचा समावेश आहे. 
......... 
तीन लाख ग्राहकांना नवीन मीटर 
जळगाव जिल्ह्यातील नऊ शहरात 1 लक्ष 51 हजार 282, धुळे जिल्ह्यातील 1 लक्ष 14 हजार 827 तर नंदुरबार जिल्ह्यातील 39 हजार 928 सिंगल फेज लघुदाब वर्गवारीतील वीज ग्राहकांना हे नवीन मीटर बसविले जाणार आहेत.