नवरात्रोत्सवात कालिकामातेचे तत्काळ पेड दर्शन ,विश्स्तांचा निर्णय

नाशिकः काही दिवसांवर येऊन ठेपलेल्या नवरात्रोत्सवात ग्रामदैवत कालिकादेवीच्या यात्रेनिमित्त दर्शनासाठी येणाऱ्या भाविकांना या वर्षीपासून प्रथमच पेड दर्शन करण्याचा निर्णय कालिका मंदिर विश्‍वस्त मंडळाच्या बैठकीत घेण्यात आला. 

नाशिककरांचे ग्रामदैवत असलेल्या श्री कालिकादेवी मंदिर विश्‍वासाची यात्राकाळातील नियोजनासंदर्भात कालिका मंदिर सभागृहात नुकतीच बैठक झाली. तीत बहुमताने हा निर्णय घेण्यात आला. कालिकादेवीच्या यात्रेत नाशिक शहर, जिल्ह्यासह धुळे, जळगाव, नंदुरबार, पुणे, मुंबई, नगर, पालघर, वाडा, सुरत आदी ठिकाणाहून लाखो भाविक दर्शनासाठी येतात. दूरवरून येणाऱ्या भाविकांसह स्थानिक भाविकांना गर्दीमुळे दर्शन घेता येत नाही. त्यामुळे "तत्काळ पेड दर्शन' सुविधा उपलब्ध करून देण्यात आली आहे. 

प्रतिवर्षी कालिकादेवी मंदिर संस्थानतर्फे या वर्षी भाविकांना सुविधा देण्यात येणार आहेत. सामाजिक बांधिलकी म्हणून बेटी बचाव अभियान, स्वच्छता अभियान, वृक्षारोपण, अवयवदान, प्लास्टिक बंदी, गोवंश जतन व पालन, वाहतुकीच्या नियमांचे काटेकोरपणे पालन करणे यावर मोठ्या प्रमाणावर जनजागृती करण्याचा मानस मंदिर संस्थानचे अध्यक्ष केशवअण्णा पाटील यांनी व्यक्त केला. या कामात विश्‍वस्तांसह नाशिककरांनी सहभागी होण्याचे आवाहनही त्यांनी केले. ग्रामदैवत कालिकादेवी मंदिर संस्थानचे सरचिटणीस डॉ. प्रतापराव कोठावळे, खजिनदार सुभाष तळाजीया, भय्यासाहेब कोठावळे, यादवराव पाटील, किशोर कोठावळे, सुरेंद्र कोठावळे, आबा पवार, दीपक तळाजीया, सतीश कोठावळे, कृष्णा कोठावळे, राम पाटील आदी उपस्थित होते.