पदभार घेण्यावरून अक्कलकुवा ग्रामपंचायती संरपच, बिडीओत वाद

वाण्याविहीर ः अक्कलकुवा ग्रामपंचायतीच्या (Gram Panchayat) ग्रामविकास अधिकाऱ्यास (Village Development Officer) पदभार देण्यावरून वाद विकोपास गेला आहे. पदभार घेऊ दिला नाही, म्हणून सरपंचांना (Sarpanch) नोटीस (Notice) बजावल्याचा राग आला. ग्रामपंचायतीच्या पदाधिकाऱ्यांनी सोमवारी थेट प्रभारी गटविकास अधिकाऱ्यांच्या दालनात जाऊन हुज्जत घातल्याचा आरोप गटविकास अधिकारी नंदकिशोर सूर्यवंशी यांनी केला आहे. याबाबत जिल्हा परिषदेचे मुख्य कार्यकारी अधिकारी (Chief Executive Officer of Zilla Parishad) व पोलिस अधीक्षकांना (Superintendent of Police) निवेदन देऊन पोलिस संरक्षणाची मागणी केली आहे. (akkalkuwa gram panchayat bdo sarpanch dispute between)

याबाबत प्रभारी गटविकास अधिकारी नंदकिशोर सूर्यवंशी यांनी दिलेल्या माहितीनुसार, महिला ग्रामसेविकांकडे अक्कलकुवा ग्रामपंचायतीचा अतिरिक्त कार्यभार सोपविला होता. मात्र, त्यांच्यावर कामाचा भार जास्त होत असल्याने त्यांच्‍या जागी ग्रामसेवक आर. आर. वळवी यांच्याकडे कार्यभार सोपविण्याचे आदेश काढले. त्यानुसार श्री. वळवी पदभार घेण्यास गेले असता, त्यांना सरपंचांसह पदाधिकाऱ्यांनी विरोध केला. याबाबत ग्रामसेवक वळवी यांनी गटविकास अधिकाऱ्यांना माहिती दिली. गटविकास अधिकारी सूर्यवंशी यांनी ग्रामपंचायत पदाधिकाऱ्यांना वेळोवेळी नोटिसा बजावल्या.

दालनात घुसून हुज्जत

त्याचा सरपंच, उपसरपंच, इतर सदस्यांना राग आला. त्यांनी अक्कलकुवा पंचायत समितीत जाऊन गटविकास अधिकारी सूर्यवंशी यांच्या दालनात घुसून हुज्जत घातली. महिला ग्रामसेविकेकडून पदभार का काढला, याबाबत विचारणा केली. वाद विकोपाला जाऊन पदाधिकारी गटविकास अधिकाऱ्यांवर चालून गेल्याचे त्यांचे म्हणणे आहे. त्यांनी पोलिसांना पाचारण केले. तत्काळ पोलिस दाखल झाले. नंतर गटविकास अधिकारी नंदकिशोर सूर्यवंशी यांनी पोलिस अधीक्षक व पोलिस निरीक्षकांकडे स्वसंरक्षणासाठी पोलिस बंदोबस्ताची मागणी केली आहे. दरम्यान, याबाबत सरपंचांशी संपर्क साधण्याचा प्रयत्न केला. मात्र, त्यांनी प्रतिसाद दिला नाही.