सहा लाखांवरील सह्यांचे राज्यपालांना दिले निवेदन 

तळोदा : शेतकरी आंदोलनाला पाठिंबा आणि शेतीविरोधी कायदे मागे घेण्याच्या मागणीसाठी राष्ट्र सेवा दलाच्या पुढाकाराने देशभरात दहा लाख सह्या गोळा करण्यात आल्या. त्यापैकी केवळ महाराष्ट्रातच सहा लाख सह्या गोळा केल्या. त्याचे एक संयुक्त निवेदन राज्यपाल भगतसिंग कोश्यारी यांना देण्यात आले. 

आवर्जून वाचा- लोकसहभागातून तयार केला तलाव; आणि पिण्याचा, शेतीचा प्रश्न सुटणार
 

शेतकरी नेते राजू शेट्टी, लोकसंघर्ष मोर्चाच्या प्रतिभा शिंदे, आमदार कपिल पाटील, राष्ट्र सेवा दलाचे राज्य कार्याध्यक्ष अर्जुन कोकाटे, नितीन मते, राजा कांदळकर, अबिद शेख, चंद्रकांत म्हात्रे, सचिन बनसोडे, रोहित ढाले आदी उपस्थित होते. आंतरराष्ट्रीय कीर्तीचे भाषाशास्त्रज्ञ, राष्ट्र सेवा दलाचे राष्ट्रीय अध्यक्ष डॉ. गणेश देवी यांनी केलेल्या आवाहनाला प्रतिसाद देत महाराष्ट्राभर सहा लाख ७५ हजारांहून अधिक सह्यांची निवेदने स्थानिक तहसीलदार, जिल्हाधिकारी, विभागीय आयुक्त यांना सेवा दल पदाधिकारी आणि समविचारी कार्यकर्त्यांनी दिली. 

केंद्र सरकारने संसदेत पारित केलेले तीनही शेतीविषयक कायदे शेतकरी विरोधी असून, त्यातून देशातील शेतकरी उद्ध्वस्त होणार आहेत. या कायद्यांविरोधात गेली तीन महिने राजधानी दिल्लीच्या सरहद्दीवर शेतकऱ्यांचे अभूतपूर्व अहिंसक आंदोलन सुरू आहे. त्याची दखल घेण्याऐवजी हे शेतकरी आंदोलन निर्दयीपणे दडपण्याचे प्रयत्न केंद्र सरकार करत आहे. या दडपशाहीच्या निषेधासाठी आणि शेतकऱ्यांच्या आंदोलनाला पाठिंबा देत शेतीविरोधी तिन्ही कायदे ताबडतोब मागे घेण्याची मागणी करण्यासाठी ही सह्यांची मोहीम हाती घेतल्याची माहिती राष्ट्र सेवा दलाचे राष्ट्रीय महासचिव अतुल देशमुख यांनी दिली. 

शेतकऱ्यांच्या देशव्यापी आंदोलनाला पाठिंबा देण्याच्या माझ्या आवाहनाला प्रतिसाद म्हणून महाराष्ट्रातील शेकडो कार्यकर्त्यांनी गेले तीन आठवडे अविश्रांत पायपीट करुन समर्थनाच्या सह्या गोळा केल्या. शेतीविषयीचे ते तीन कायदे मागे घ्या. या आवाजात ज्यांचे स्वर मिसळले त्या परिचयाच्या आणि अपिरिचित प्रत्येकाला माझा सलाम. 
- गणेश देवी, राष्ट्रीय अध्यक्ष, राष्ट्र सेवा दल 
 

संपादन- भूषण श्रीखंडे