योगसाधनेतुन पोलिसांचा मनोबलाचा ध्यास !

पारोळा : कोरोनाचा अटकाव करण्यासाठी प्रशासन शर्थीचे प्रयत्न करित आहे.सामुहीक एकजुटीतुन शहरात एकमुखी निर्णयाची अंमलबजावणी केली जाते.ही बाब विशेष मानावी लागेल.वैद्यकिय,पालिका व महसुल विभागील अधिकारी व कर्मचारी हे प्रामाणिकपणे कोरोना संकटाचा मुकाबला करित आहे.अश्या कठीण परिस्थितीत पोलिस प्रशासन देखील आपली भुमिका अगदी चोख पणे पोलिस निरीक्षक लिलाधर कानडे यांच्या मार्गदर्शनाखाली निभावत आहे. अश्या परिस्थितीत पोलिसांची रोगप्रतिकारक शक्ती व मनोबल वाढविण्यासाठी योग शिक्षक तथा किसान महाविद्यालयाचे सेवानिवृत्त उपप्राचार्य विकास सोनवणे यांनी योगाचे धडे देत सामाजिक बांधिलकी जोपासण्याचा प्रयत्न केला आहे.पोलिसांचे योगसाधनेतुन अशा प्रकारे सेवा देणारे हे पहीलेच योगशिक्षक असण्याची शक्यता आहे.त्यांच्या सेवाभावी कार्याचे अनेकांनी कौतुक व गौरव केला आहे.

येथील योगशिक्षक विकास सोनवणे गेल्या अनेक वर्षापासुन सेवानिवृत्तीनंतर सर्वच क्षेत्रातील व्यक्तींना योगाचे धडे देत मनोबल वाढविण्याचा प्रयत्न करित आहेत.तालुक्यातील प्राथमिक शाळेत जावुन विद्यार्थ्यांचा शैक्षणिक संगोपन बरोबर मानसिक व शाररिक मनोधैर्य वाढविण्याचे काम त्यांनी आजवर केले आहे.
तसेच शहरातील गरजु व योगसाधनेशी जुळलेल्या व्यक्तींना ते सकाळ व संध्याकाळ वेगवेगळे प्राणायम शिकवत असल्याने अनेकांनी योगसाधनेतुन शरीरातील अनेक विकारांवर विजय मिळविला आहे.

पोलिस कार्यालयतच योगसाधना 
प्रत्येक पोलिस कर्मचारी किंवा अधिकार्यास योगसाधनेचे महत्व,त्यातील फायदे व शाररीक तंदुरुस्ती बाबत योगशिक्षक सोनवणे यांनी पोलिस कार्यालयात अनेक योगाचे प्रात्यक्षिक करुन दाखविले. यामुळे अनेकांनी बारकाईने या योगसाधनाबाबत माहीती घेत मिळेल त्या वेळात योग करित आपली प्रतिकारक शक्ती वाढवित आहे.

योग शिक्षकाच्या सेवाभावी कार्याचे अनेकांकडुन कौतुक 
कोरोना संसर्गाच्या कठीण परिस्थितीत जो तो आपले आरोग्य सांभाळत दैनंदिन कार्य करित आहे.मात्र कोरोना योध्दांचे मनोधैर्य उंचावले जावे,त्यांच्यातील  शाररीक व मानसिक तंदुरुस्तीस वृध्दी मिळावी.या भावनेपोटी योग शिक्षक विकास सोनवणे हे आपल्या परिने या कठीण काळात योगाचे धडे सामाजिक बांधिलकी जोपासत आहे.पोलिसांसह इतर कोरोना योध्दांना ते योगसाधना शिकवित असल्याने अनेकांनी त्यांच्या कार्याचे कौतुक केले.

 तालुक्यात कोरोनाचा संसर्ग कमी व्हावा,यासाठी प्रशासन आपल्या परिने कार्य करित आहे.सामाजिक बांधिलकीतुन योगसाधनेच्या अनुभव व त्यातुन वाढणारे मनोबल लक्षात घेता रात्रंदिवस खडा पहारा देणारे पोलिस कर्मचारी यांची प्रतिकारक शक्तीत वाढ व्हावी.योगाच्या अनेक प्राणायमातुन मनोधैर्य उंचावले जावे हा हेतु ठेवत हे कार्य केल्याचे समाधान आहे.
विकास सोनवणे,योगशिक्षक तथा सेवानिवृत्त उपप्राचार्य किसान महाविद्यालय,पारोळा