अखेर या रस्त्याचा मुहूर्त सापडला

जळगाव : राष्ट्रीय महामार्गाच्या चौपदरीकरणाच्या तरसोद ते चिखली या पहिल्या टप्प्याचे काम वेगात सुरू आहे. दुसरीकडे आता रखडलेल्या तरसोद ते फागणे दरम्यानच्या दुसऱ्या टप्प्याचेही चौपदरीकरणाचे काम सुरू झाले आहे. अतिपावसामुळे सप्टेंबर, ऑक्‍टोबर महिन्यात कामांत खंड पडला होता. मात्र, नोव्हेंबरच्या मध्यापासून चौपदरीकरणाचे काम पुन्हा सुरू झाले आहे. 

जानेवारीपासून तरसोद ते फागणे महामार्गाच्या चौपदरीकरणाचे काम बंद होते. एमबीएल इन्फ्रास्ट्रक्‍चर कंपनीने बॅंक गॅरंटी न दिल्याने तब्बल दोन महिने काम रखडले होते. नंतर हे काम विविध कारणांनी रखडत गेले. पावसाळ्यात अतिपावसाने महामार्गावर काम करता आले नाही. आतापर्यंत ऍग्रो इन्फ्रास्ट्रक्‍चर डेव्हलपर नोव्हेंबरपासून कामास गती घेतली आहे. तूर्त टेक्‍निकल डिपार्टमेंटचे शंभर ते दीडशे लोक काम करताहेत. प्रत्यक्ष फिल्डवर सव्वाशे कामगार कार्यरत आहेत. 

कामाचा वेग वाढविण्याची गरज 
पाळधी ते फागणे दरम्यानचा महामार्ग हा मृत्यूचा सापळा बनला आहे. या मार्गावर रोज अपघात होतात. त्यामुळे चौपदरीकरणाचे काम लवकर होण्यासाठी प्रयत्न झाले पाहिजे. रात्रंदिवस काम सुरू झाले तर काम पूर्णत्वास लवकर येईल व वाहतुकीसाठी मार्ग मोठा होईल. परिणामी, अपघात होणार नाहीत, असे नागरिकांचे म्हणणे आहे. 

फागणे ते तरसोद : 87.3 कि.मी. 
अपेक्षित खर्च : 940 कोटी रुपये 
मक्तेदार कंपनी : ऍग्रो इन्फ्रास्ट्रक्‍चर डेव्हलपर