नाशिक - गेल्या महिन्यात येथील मुथुट फायनान्स कंपनीच्या कार्यालयावरील दरोडा प्रकरणात तिसरा संशयित कुख्यात आकाशसिंग विजयबहादूरसिंग राजपूत (वय 30, रा. रामपूर, ता. मच्छली, उत्तर प्रदेश) यास बिहारमधील आरा शहरातून अटक करण्यात आली आहे. या घटनेत मृत्युमुखी पडलेला अभियंता सॅजू सॅम्युअलवर आकाशसिंग यानेच पाच गोळ्या झाडल्याची कबुली दिली असून, जिल्हा न्यायालयाने त्यास 12 दिवसांची पोलिस कोठडी सुनावली. दरम्यान, या दरोड्याचा मुख्य सूत्रधार कुख्यात दरोडेखोर सुबोधसिंग असल्याचे तपासातून निष्पन्न झाले असून, या टोळीविरोधात नाशिक पोलिसांकडून मोक्काअन्वये कारवाई केली जाणार आहे.
मुथुट फायनान्स दरोडाप्रकरणी यापूर्वी पोलिसांनी जितेंद्रसिंग राजपूत, परमेंदरसिंग या दोघांना अटक केली आहे, तर आकाशसिंग हा तिसरा संशयित अटक झाला आहे. आकाशसिंग बिहारमध्ये असल्याची माहिती मिळताच नाशिक गुन्हे शाखा युनिट दोन व अंबड पोलिस अशी दोन पथके 16 दिवसांपूर्वी रवाना झाली होती. पाटना, दानापूर, राजीवनगर, रुपसपूर येथे त्याचा शोध घेतला; परंतु तो ठिकाणे बदलत असल्याने आरा शहरात गेल्याचे समजल्यावर पोलिस त्याच्या मागावर गेले.
बिहारी वेशभूषा करून पोलिसांनी त्याचा शोध घेतला असता, आरा शहरात असल्याचे निश्चित झाले. सतत तीन-चार दिवस सापळा रचल्यानंतर विष्णूनगरमधील त्याच्या स्विफ्ट कारकडे येणार असल्याची माहिती मिळताच पोलिसांनी त्यास शिताफीने अटक केली.
|