शहर बससेवेबाबत वास्तवदर्शी अहवाल सादर करा

नाशिक - सार्वजनिक वाहतूक व्यवस्था सक्षम करण्यासाठी महापालिकेने सर्वंकष वाहतूक आराखडा सादर करून शहर बस वाहतूक चालविण्यास घेण्यासाठी सल्लागार संस्था नियुक्त केली होती. त्या क्रिसिल संस्थेचे आजपासून काम सुरू झाले. पुढील तीन महिन्यांत वास्तवदर्शी अहवाल सादर करण्याच्या सूचना संस्थेला देण्यात आल्या.

महापालिका आयुक्त अभिषेक कृष्णा यांच्या दालनात झालेल्या बैठकीला क्रिसिलचे अभय वर्तक, अतिरिक्त आयुक्त रमेश पवार, किशोर बोर्डे, शहर अभियंता यू. बी. पवार, स्मार्टसिटीचे सीईओ प्रकाश थविल, कार्यकारी अभियंता शिवाजी चव्हाणके व बाजीराव माळी उपस्थित होते. ऑगस्टमध्ये महापालिकेला वाहतुकीचा सर्वंकष आराखडा सादर करण्यात आला होता. त्यात पुढील वीस वर्षांचा विचार करून वाहतुकीची स्थिती दर्शविली होती. सक्षम वाहतुकीसाठी रस्ते रुंदीकरण, उड्डाणपूल, प्रस्तावित रिंगरोड, सायकल ट्रॅक आदींचा विचार करण्यात आला होता. सद्यःस्थितीत शहरात ६९८ बसगाड्यांची गरज नमूद केली होती. आराखडा सादर झाल्यानंतर महापालिकेला शहर बससेवा चालविणे परवडेल का?, महापालिकेने बससेवा ताब्यात घ्यावी का? या विषयांवर सविस्तर अहवाल तयार करण्यासाठी सल्लागार संस्था नियुक्तीचा निर्णय घेण्यात आला होता. त्यानुसार क्रिसिल कंपनीला सर्वेक्षणाचे काम देण्यात आले. पंधरा लाख खर्चून तीन महिन्यांत अहवाल देण्याच्या सूचना देण्यात आल्या.

सर्वेक्षणात महत्त्वाच्या बाबी
सार्वजनिक वाहतूक व्यवस्था महापालिकेने ताब्यात घ्यावी का?
बससेवा सुरू करायची असेल, तर किती बसची आवश्‍यकता आहे?
आर्थिकदृष्ट्या महापालिकेला परवडेल का?
महापालिका किंवा खासगीकरणातून बस चालविता येईल का?