Nashik 11th Admission : अकरावी प्रवेशासाठी शिक्षण विभागाकडून मुदतवाढ; जाणुन घ्या सुधारित वेळापत्रक

Nashik 11th Admission : येथील नाशिक महापालिका क्षेत्रातील कनिष्ठ महाविद्यालयांत अकरावी प्रवेशासाठी सुरु असलेल्‍या केंद्रीभूत ऑनलाइन प्रवेश प्रक्रियेत नोंदणीला मुदतवाढ दिली आहे. (11th admission Education department extends deadline nashik news)

शिक्षण विभागाने मुदतवाढ देण्याचा निर्णय घेतला असून,त्‍यानुसार अर्जाचा भाग एक भरण्याची प्रक्रिया बुधवारी (ता.१४) सायंकाळी पाचपर्यंत सुरु राहील. अर्जाचा भाग दोन भरण्याची मुदत १७ जूनपर्यंत असणार आहे.

शैक्षणिक वर्ष २०२३-२४ मध्ये अकरावीच्‍या प्रवेशासाठी पहिली नियमित फेरी पार पडते आहे. यापूर्वी जाहीर केलेल्‍या वेळापत्रकानुसार पहिल्‍या फेरीत सहभागासाठी विद्यार्थ्यांना अर्जाचा भाग एक भरण्याची मुदत काल (ता.१२) पर्यंत दिलेली होती. परंतु मोठ्या संख्येने नोंदणीकृत विद्यार्थ्यांनी अर्जाचे प्रमाणिकरण केलेले नाही.

तसेच अद्यापपर्यंत इयत्ता दहावीच्‍या गुणपत्रिकांचे वितरण करण्यात आलेले नाही. बुधवारी (ता.१४) गुणपत्रिकांचे वितरण शाळांमार्फत केले जाणार असून, यानंतर विद्यार्थ्यांना शाळा सोडल्‍याचा दाखला प्राप्त करून घेता येणार आहे. ही गोष्ट लक्षात घेताना शिक्षण विभागाने पहिल्‍या फेरीत सहभागासाठी नोंदणीची मुदत वाढविण्याचा निर्णय घेतला आहे.

हेही वाचा : Credit Card फसवणूक....काय घ्याल काळजी?

त्‍यानुसार आता सुधारित वेळापत्रकानुसार विद्यार्थ्यांना अकरावी प्रवेशासाठी नोंदणी करणे व अर्जाचा भाग एक भरण्यासाठी बुधवारी (ता.१४) सायंकाळी पाचपर्यंत मुदत असेल. महाविद्यालय व शाखेचा पसंतीक्रम नोंदविण्यासाठी आवश्‍यक असलेला अर्जाचा भाग दोन १७ जूनपर्यंत भरता येणार आहे.

असे आहे सुधारित वेळापत्रक

नोंदणीसाठी मुदतवाढ दिल्‍याने पुढील वेळापत्रकामध्येही बदल झालेला आहे. अर्जाचा भाग एक भरण्याची मुदत संपल्‍यानंतर गुरुवारी (ता.१५) सकाळी दहाला सर्वसाधारण गुणवत्ता यादी जाहीर केली जाणार आहे.

गुणवत्ता यादीबाबत हरकती नोंदविणे व दुरुस्‍तीबाबत १७ जूनपर्यंत प्रक्रिया राबविली जाणार आहे. माहितीचे विश्‍लेषण करण्यासाठी शिक्षण विभागाने १८ ते २० जून या कालावधी राखीव ठेवलेला आहे. २१ जूनला पहिल्‍या नियमित फेरीची निवड यादी प्रसिद्ध केली जाणार आहे. यादीतील विद्यार्थ्यांना प्रवेशासाठी २४ जूनपर्यंत मुदत उपलब्‍ध असणार आहे.