Asian Half Marathon: आशियाई अर्धमॅरेथॉनमध्ये महिला संघास कांस्‍य; नाशिकच्‍या पूनमची यशस्‍वी कामगिरी

Asian Half Marathon : दुबई येथे झालेल्‍या पहिल्‍या आशियाई अर्धमॅरेथॉन २०२३ स्‍पर्धेत भारतीय धावपटूंनी आपली छाप सोडली आहे.

शनिवारी (ता. ११) झालेल्‍या या स्‍पर्धेत पुरुष गटात सांघिक प्रकारात सुवर्णपदकाची कमाई केली. महिला गटातून सांघिक प्रकारात कांस्‍यपदक पटकावले आहे. (Asian Half Marathon women team won Bronze medal nashik news)

या संघात नाशिकची धावपटू पूनम सोनुने हिचा सहभाग होता. स्‍पर्धेत भारतीय संघाकडून सहभागी होताना नाशिकच्‍या पूनम सोनुने हिने एक तास १९ मिनिटे २८ सेकंद वेळ नोंदविताना भरीव कामगिरी केली. संघातील कविता यादव हिने एक तास १९ मिनिटे ३३ सेकंद आणि रिमा पटेल हिने एक तास १९ मिनिटे ४० सेकंद अशी वेळ नोंदविली.

स्‍पर्धेत भारताला एकूण तीन पदके मिळाली असून, यात एक सुवर्ण व दोन कांस्‍यपदकांचा समावेश आहे. सुवर्णपदक विजेत्‍या भारताच्‍या संघात सावन बरवाल, कार्तिक कुमार व अभिषेक पाल यांनी सुवर्णपदक पटकावले. वैयक्‍तिक गटातून सावन याने एक तास चार मिनिटे ३० सेकंद वेळ नोंदविताना कांस्‍यपदक जिंकले.