Nashik : बिबट्याच्या हल्ल्यात मुलगा जखमी

पंचवटी (जि, नाशिक) : सातपूर लोकवस्ती असलेल्या भागात बिबट्या (Leopard) आढळून आल्याची घटना ताजी असताना म्हसरूळ- आडगाव लिंकरोडवरील जाधव - देशमुख वस्तीवर पाच वर्षीय मुलावर बिबट्याने हल्ला (Attack) केल्याची घटना मंगळवार (ता. ५) रोजी रात्रीच्या सुमारास घडली आहे. बिबट्याच्या हल्ल्यात मुलगा गंभीर जखमी झाला असून, त्यावर खाजगी रुग्णालयात उपचार सुरू आहेत. या घटनेने परिसरात घबराटीचे वातावरण निर्माण झाले आहे. (Boy injured in leopard attack Nashik news)

या घटनेबाबत अधिक माहिती अशी की, म्हसरूळ -आडगाव लिंकरोडवर शेतमळ्यांची वस्ती आहे. याच लिंक रोडवर जाधव - देशमुख व कडाळे वस्ती आहे. येथे आडगाव येथील दीपक त्रंबक देशमुख (वय ४०) यांची शेती आहे आणि येथेच त्याच्या कुटुंबासह ते वास्तव्य करतात. मंगळवार (ता.५) रोजी रात्री साडे आठ ते नऊ वाजेच्या सुमारास दीपक देशमुख यांच्या पत्नी या घराच्या ओट्यावर भांडी घासत होत्या. त्यांचा पाच वर्षीय मुलगा साई हा खेळत होता. यावेळी दबा धरून बसलेल्या बिबट्याने अचानकपणे साई वर हल्ला चढविला .त्यास समोर असलेल्या मक्याच्या शेतात ओढून नेले. यावेळी दीपक देशमुख यांची पत्नी व घरातील इतर लोकांनी आरडाओरडा केला. त्यामुळे काहीजण बिबटया गेला तिकडे धावत गेले. तेव्हा बिबट्याने मुलगा साई यास सोडून धूम ठोकली, यात साई हा गंभीर जखमी झाला असून त्यावर खाली उपचार सुरू आहे सदर घटनेची माहिती वनविभागाला कळतात त्यांनी घटनास्थळी धाव घेतली व पाहणी केली.

तसेच जखमी साई यास रुग्णालयात जाऊन चौकशी देखील केली. जाधव-देशमुख-कडाळे वस्ती वरील शेतकऱ्यांमध्ये भीतीचे वातावरण निर्माण झाले आहे. या बिबट्याचा लवकरात लवकर बंदोबस्त करण्याची मागणी केली आहे.त्यानुसार वन विभाग त्या भागात पिंजरा बसविणार आहेत.तसेच वन विभगाचे अधिकारी भदाणे यांनी शेत वस्तीवरील रहिवाश्यांना सतर्क राहण्याचे आवाहन केले आहे.