ZP च्‍या शाखा अभियंत्‍यास दीड लाखांची लाच स्‍वीकारतांना अटक

नाशिक : जिल्‍हा परिषदेतील (ZP) पाणीपुरवठा विभागाच्‍या शाखा अभियंत्‍याला लाच स्‍वीकारताना लाचलुचपत प्रतिबंधक विभागाने शुक्रवारी (ता. ३) रंगेहाथ पकडले. कामाच्‍या टक्‍केवारीच्‍या मोबदल्यात दीड लाख रुपयांची लाच घेताना सापळा रचून अटक करण्यात आली.
अमोल खंडेराव घुगे असे लाचखोर अभियंत्‍याचे नाव आहे. भद्रकाली पोलिस ठाण्यात गुन्‍हा दाखल करण्याची प्रक्रिया शुक्रवारी रात्री उशिरापर्यंत सुरू होती.

तक्रारदार हा शासकीय स्थापत्य कंत्राटदार आहे. त्यांनी मौजे पाथरे (ता. सिन्नर) परिसरात नळ पाणीपुरवठ्याचे काम केले आहे. या कामाकरिता ४८ लाख रुपयांचे देयक तयार केले. बिल मंजूर करण्याच्‍या मोबदल्‍यात घुगेने ४ टक्‍के अर्थात एक लाख ९० हजार रुपयांची लाच मागितली होती.

तडजोडीनंतर ३ टक्‍के म्‍हणजेच दीड लाख रुपये रक्‍कम कार्यालयात स्वीकारताना रंगेहाथ पकडण्यात आले आहे. ही कारवाई लाचलुचपत प्रतिबंधक विभागाचे अधीक्षक सुनील कडासने, अपर पोलिस अधीक्षक नारायण न्याहळदे यांच्या मार्गदर्शनाखाली सापळा अधिकारी व उपअधीक्षक अभिषेक पाटील, हवालदार सुकदेव मुरकुटे, पोलिस नाईक मनोज पाटील यांनी केली.

जिल्‍हा परिषदेत भ्रष्टाचाराचा विळखा
यापूर्वी जिल्हा परिषदेच्या तत्‍कालीन माध्यमिक शिक्षणाधिकारी वैशाली झनकर यांच्‍याकरिता लाच स्‍वीकारताना चालकाला ठाण्यातील पथकाने सापळा रचून पकडले होते. या प्रकरणी श्रीमती झनकर यांच्‍यावर कारवाई करण्यात आली होती. त्‍यानंतर आता घुगेलाही लाचलुचपत प्रतिबंधक विभागाने कारवाई करत अटक केल्‍याने यानिमित्त जिल्‍हा परिषदेला भ्रष्टाचाराचा विळखा असल्‍याची चर्चा सुरू झाली आहे.