ठेकेदाराच्या मनमानीला वैतागले सफाई कामगार; पुकारले बमुदत उपोषण

त्र्यंबकेश्वर (जि. नाशिक) : जुन्या सफाई कर्मचाऱ्यांना कामावर घ्यावे यासह येथील नगरपरिषदेच्या ठेकदाराकडून होणाऱ्या मनमानी, अन्यायाविरोधात सफाई कामगारांनी बेमुदत उपोषण सुरू केले आहे. प्रहार सफाई कर्मचारी युनियनने याबाबत निवेदन दिले असून कर्मचाऱ्यांना कामावर घेईपर्यत आंदोलन मागे घेतले जाणार नाही असे त्यांनी स्पष्ट केले, त्यामुळे सफाई कर्मचाऱ्यांचा प्रश्न पुन्हा एकदा चर्चेत आला आहे.

कर्मचारी मागण्यांवर ठाम

नगरपरिषदेने काही सफाई कर्मचारींना कामावरून कमी केले आहे, त्यांना कामावर घ्यावे ही प्रमुख मागणी आहे. याबाबत कामगार राज्यमंत्री बच्चू कडू यांच्या दालनात सात जुलै २१ ला मुंबई येथे बैठक झाली होती, तीत मुख्याधिकारी संजय जाधव, कामगार आयुक्त माळी, त्र्यंबकेश्वर सफाई कामगार ठेकेदार सह्याद्री कंट्रक्शन व सर्व सफाई कामगार उपस्थित होते. या बैठकीमध्ये जुन्या कर्मचाऱ्यांना प्राधान्य देऊन कामावर हजर करून घेण्याचे आदेश दिले होते. परंतु कामगार आयुक्त व राज्यमंत्री यांच्या आदेशाची अवहेलना करून नगरपालिकेने हजर करून घेतलेले नाही. मंदिर उघडल्यानंतर सर्व कर्मचाऱ्यांना कामावर हजर करून घेणार असे आश्वासन देण्यात आले होते, परंतु तेही पाळण्यात आलेले नाही. ठेकेदाराने मुख्याधिकारींनाही न जुमानता बाहेरून नवीन कर्मचारी आणून जुन्या कर्मचाऱ्यांवर अन्याय केला आहे.

त्या विरोधात प्रहार जनशक्ती पक्ष व नगरसेविका कल्पना लहांगे, त्रिवेणी तुंगार, मंगलाताई आराधी, भाजपचे तालुकाध्यक्ष व नगरसेवक विष्णू दोभाडे यांनी या उपोषणाला पाठिंबा दिला आहे. त्र्यंबकेश्वर तालुकाध्यक्ष अनंत उपाध्ये यांच्या नेतृत्वाखाली आंदोलन सुरूच राहिल असे सांगण्यात आले.