जिल्ह्यात 17 पॉझिटिव्‍ह, 11 रुग्‍ण कोरोनामुक्‍त

नाशिक : जिल्ह्या‍त दैनंदिन कोरोनाबाधितांचा आकडा वाढत असताना कोरोनामुक्‍त रुग्‍णसंख्येतही समाधानकारक वाढ झालेली आहे. रविवारी जिल्ह्या‍त १७ रुग्‍णांचे कोरोनाविषयक अहवाल पॉझिटिव्‍ह आले, तर दुसरीकडे ११ रुग्‍णांनी कोरोनावर यशस्‍वीरीत्‍या मात केली. सद्यःस्‍थितीत जिल्ह्यात उपचार घेणाऱ्या सक्रिय रुग्‍णांची संख्या ८८ झाली आहे.

रविवारी नाशिक महापालिका क्षेत्रातील १३, नाशिक ग्रामीण भागातील दोन, तर जिल्‍ह्याबाहेरील दोन रुग्‍णांना कोरोनाची लागण झाल्‍याचे निदान झाले आहे. दिवसभरात मालेगाव महापालिका क्षेत्रात नव्‍याने बाधित आढळून आला नाही. सध्या जिल्ह्यात उपचार घेणाऱ्या कोरोनाबाधितांची संख्या ८८ झाली असून, यांपैकी ६८ बाधित नाशिक महापालिका क्षेत्रातील आहेत. नाशिक ग्रामीणमधील दहा, मालेगाव महापालिका क्षेत्रातील दोन, तर जिल्ह्याबाहेरील आठ रुग्‍णांवर सध्या जिल्ह्यात उपचार सुरू आहेत. या ८८ पॉझिटिव्‍हपैकी अवघ्या १६ बाधितांमध्ये लक्षणे आढळून आलेली आहेत. सायंकाळी उशिरापर्यंत २० अहवाल प्रलंबित होते. हे सर्व प्रलंबित अहवाल नाशिक महापालिका क्षेत्रातील रुग्‍णांचे होते.