रोहिल्याचा डोंगर पुन्हा आगीच्या भक्ष्यस्थानी; झाडे, वन्यप्राणी व पक्ष्यांची अपरिमित जीवितहानी

गिरणारे/गंगापूर (नाशिक) : रोहिला (ता. त्र्यंबकेश्वर) येथील वनक्षेत्रातील डोंगर अज्ञाताने लावलेल्या आगीत पुन्हा भक्ष्यस्थानी पडला. दर वर्षी या वनक्षेत्रात वणवा लावण्याचे प्रकार घडतात. डोंगरावरील रोपटी, झाडांची, वन्यप्राणी व पक्ष्यांची अपरिमित जीवितहानी झाली आहे. 

रोहिल्याच्या डोंगरावरील वृक्षसंपदा वणव्यात खाक 
दर वर्षी वन विभाग व सामाजिक संस्था डोंगरमाथ्यावर हजारो झाडांचे रोपण करतात. या वनक्षेत्रात गेल्या वर्षी मराठी चित्रपट कलावंतांनी, सामाजिक संस्थांनी याच डोंगरावर वृक्षारोपण केले होते. डोंगरावर अज्ञातांकडून आग लावण्याचे प्रकार घडतात. वनक्षेत्रात आगी लावणारे कोण, हे शोधण्याचे काम वन विभागाचे असून, आजपर्यंत याबद्दल कुठलीही साधी जागृती वन विभाग करीत नसल्याने वने असुरक्षित व जंगलघाट आगीच्या वणव्याच्या भक्ष्यस्थानी पडत आहे, अशी तक्रारच वनमित्रांनी केली. 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप

आग लावणाऱ्यांवर कारवाईची मागणी 
रोहिल्याच्या वनक्षेत्रात हजारो झाडे दर वर्षी लावली जातात. नैसर्गिक तळे, जलाशये, वनक्षेत्र वणव्यात नष्ट झाल्याने मोठे दुःख होते. पक्ष्यांची पिल्ले, अंडी सगळे जळून गेले. जंगलात वन विभाग संरक्षण देण्यात कमी पडतो. हे दुष्टचक्र सुरू राहिले, तर पर्यावरण संवर्धनाचा हा देखावा उरेल. -विष्णू माळेकर, सामाजिक कार्यकर्ता  

हेही वाचा - सावधान! आतापर्यंत पक्ष्यांच्या जिवावर बेतणारे प्रकार आता माणसांवरही; महिलेचा बळी