डॉ. झाकीर हुसेन ऑक्सीजन गळती दुर्घटना : कारवाईसंदर्भात संशय

नाशिक : डॉ. झाकीर हुसेन रुग्णालयातील (dr. zakir hussain oxgen leak incident) दुर्घटनेला जबाबदार धरतं पुणे येथील तायो निप्पॉन कंपनीला (tayo nippon company) काळ्या यादीत टाकण्याच्या हालचाली प्रशासनाकडून सुरू झाल्या आहे. मात्र या कंपनीकडून स्वस्तात ऑक्सिजन उपलब्ध होत असून दुसरीकडे स्थानिक कंपनीकडून दुप्पट्टीपेक्षा अधिक दराने ऑक्सिजन पुरवठा केला जातो. ही जमेची बाजू लक्षात असताना त्याच कंपनीला का काळ्या यादीत टाकले जात आहे, कारवाई करायची तर दोन्ही कंपनीवर का नाही, असा सवाल उपस्थित होत कारवाईसंदर्भात संशय व्यक्त होत आहे.

कारवाईसंदर्भात संशय

२१ एप्रिल रोजी महापालिकेच्या डॉ. जाकीर हुसेन रुग्णालयात टाकीमध्ये ऑक्सिजन भरताना गळती होऊन २४ रुग्णांचा मृत्यू ओढावला. या घटनेची राज्य सरकारने दखल घेत विभागीय आयुक्त राधाकृष्ण गमे यांच्या अध्यक्षतेखाली चौकशी समिती नियुक्त केली. समितीने नुकताचं राज्य शासनाला अहवाल सादर केला. अहवालात दोषी धरण्यात आलेल्या पुणे येथील तायो निप्पॉन व स्थानिक जाधव सप्लायर्स या कंपन्यांवर अनुक्रमे २२ लाख व दोन लाख रुपयांची दंडात्मक कारवाईच्या नोटिसा बजावण्यात आल्या. नोटीस बजावल्यानंतर कारवाईची प्रक्रिया पूर्ण होत असतानाचं आता तायो निप्पॉन कंपनीला काळ्या यादीत टाकण्याच्या हालचाली सुरू झाल्या आहेत.

फक्त तायो निप्पॉन कंपनीच का?

वास्तविक दोन कंपन्यांना जबाबदार धरतं दंडात्मक कारवाईच्या नोटीस बजावल्या असताना तायो निप्पॉन या एकमेव कंपनीला काळ्या यादीत टाकण्याच्या हालचालींमुळे प्रशासनाभोवती संशयाचे ढग जमा झाले आहेत. काळ्या यादीत समावेश करायचा असेल तर जाधव ट्रेडर्स या कंपनीचा देखील काळ्या यादीत समावेश करणे गरजेचे आहे, असे असताना फक्त तायो निप्पॉन कंपनी का? असा सवाल उपस्थित होत आहे. तायो निप्पॉन कंपनी सोबत पुढील दहा वर्षांसाठी १५ रुपये क्युबिक मीटरने ऑक्सिजन पुरवठ्याचा करार आहे. जाधव ट्रेडर्स या स्थानिक पुरवठादार कंपनीने ३९ रुपये क्युबिक मीटर दराने पुरवठा करणार असल्याचे समजते. दुप्पटीपेक्षा जादा दराने ऑक्सिजन खरेदी करण्यासाठी स्पर्धक व कमी किमतीने ऑक्सिजन पुरवठादार कंपनीला काळ्या यादीत टाकून बाद करण्याचा डाव असल्याचे बोलले जात आहे.