Nashik Crime News : नगरसेविका पुत्राकडून उकळली खंडणी; 5 जणांवर गुन्हा दाखल

नाशिक : भाजपच्या महिला नगरसेविका इंदुमती नागरे याचे पुत्र व ठेकेदार विक्रम नागरे यांच्याकडून खंडणी उकळून ठार करण्याची धमकी दिल्याप्रकरणी सातपूर पोलिस ठाण्यात भाजप मंडळ अध्यक्षांचा भाऊ रोशन काकड, संजय जाधव यांच्यासह अन्य पाच संशयितांविरुद्ध गुन्हा नोंदविण्यात आला. (Extortion extorted from bjp corporator indumati nagare son case registered against 5 persons Nashik Latest Crime News)

सातपूरचे वरिष्ठ पोलिस निरीक्षक महेंद्र चव्हाण यांनी सांगितले, की ३१ ऑक्टोबर ते १ नोव्हेंबरदरम्यान भाजप पदाधिकारी व नगरसेविका इंदुमती नागरे याचे पुत्र व कामगार ठेकेदार विक्रम नागरे पिंपळगाव बहुला येथील वडिलोपार्जित जमिनीकडे जात असताना वाटेतच भाजप मंडळ अध्यक्ष काकड यांचे बंधू रोशन काकड, दीपक भालेराव, संजय जाधव, गणेश अशोक लहाने, गौरव गुलब्या घुगे, अनिरुद्ध शिंदे, जया दिवे आदीसह अन्य संशयितांनी नागरे याची गाडी अडवून पाच लाखाची खंडणी मागितली. तसेच मोबाईलद्वारे वेळोवेळी ठार करण्याची धमकी दिली. ३० ऑक्टोबरला नागरे कामानिमित्त बेळगावला गेले असता, रात्री निवासस्थानी येऊन संशयितानी नागरे यांना शिवीगाळ करत बॅनर फाडले व दारूच्या बाटल्या फोडून घरावर दगडफेक केली.

याबाबतचे सीसीटीव्ही फुटेज देत नागरे यांनी २ नोव्हेंबरला सातपूर पोलिस ठाण्यात फिर्याद दिली. या प्रकरणी पोलिस उपायुक्त विजय खरात, सहाय्यक आयुक्त सोहेल शेख व सातपूरचे वरीष्ठ निरीक्षक महेंद्र चव्हाण यांच्या मार्गदर्शनाखाली क्राइम युनिट तपास करत आहे. यात दोन संशयितांना अटक झाली.

दुसरीकडे विक्रम नागरे आमच्या गुन्हेगारीचा उपयोग करून औद्योगिक क्षेत्रात युनियन, ठेकेदारीसह इतर अवैद्य धंदावर बस्तान बसवून कोट्यवधीची माया कमावली आहे. अडीअडचणीला पैसे मागितले, तर खोटे गुन्हे दाखल करून अटकवत असल्याचा आरोप संशयितांच्या नातेवाइकांनी केला आहे.

अजून काही साथीदार रडारवर

विक्रम नागरे याची गुन्हेगारी पार्श्वभूमी पाहता यापूर्वीच्या ठेकेदारीवरून औद्योगिक वसाहतीत वाद झाले आहेत. त्यात त्यांच्यावर हल्ला करण्यासाठी आलेल्या संशयितांनी त्यांच्या साथीदार अमोल हिगेवरच हल्ला झाल्याचे पोलिस तपासात सिद्ध झाले होते. तसेच साथीदार जितू भागंरे याच्यावरही अंबड औद्योगिक वसाहतीत हल्ला करण्यात आल्याची घटना समोर आली आहे. अजून काही साथीदार रडारवर असल्याची चर्चा आहे.

संशयितांविरुद्ध खून, दरोडा, खंडणीसह इतर गुन्हे दाखल

रोशन हरिदास काकड : ३०२, ३६३

संजय जाधव : ३०२

दीपक भास्कर भालेराव : ३०२, ३६३

अनिरुद्ध शिंदे : ३०२

जया दिवे : २९६

(वरील सर्व संशयित जामिनावर बाहेर आहेत)