Farmer Agitation : थकबाकीदार शेतकऱ्यांचा उद्या जिल्हाधिकारी कार्यालयावर मोर्चा

Farmer Agitation : जिल्हा मध्यवर्ती सहकारी बँकेने सुरू केलेली सक्तीची वसुली व शेतकऱ्यांच्या सातबारा खाते उताऱ्यावर शेतकऱ्याचे नाव कमी करून त्या जागेवर विविध कार्यकारी सहकारी संस्थेचे नाव लावण्याचे काम तत्काळ थांबवावे, तसेच शासनाने या थकबाकीदार शेतकऱ्यांची कर्जमाफी करून शेतकऱ्यांना कर्जमुक्त करावे, या मागणीसाठी बुधवारी (ता.१४) गोल्फ क्लब मैदानापासून शेतकऱ्यांचा मोर्चा काढण्यात येणार आहे. (Farmer Agitation Arrears farmers will march to nashik Collectorate tomorrow)

हेही वाचा : Credit Card फसवणूक....काय घ्याल काळजी?

मोर्चा सकाळी अकरा वाजता जिल्हाधिकारी कार्यालयावर तसेच जिल्हा मध्यवर्ती बँकेवर व विभागीय सहनिबंधक कार्यालयावर जाणार आहे. या मोर्चात शेतकऱ्यांनी सहभागी व्हावे, असे आवाहन शेतकरी संघर्ष समितीचे अध्यक्ष भगवान बोराडे, सुधाकर मोगल, दिलीप पाटील, रावसाहेब एतवाडे, कैलास बोरसे यांनी केले आहे.

१६ जानेवारी रोजी मालेगाव येथे पालकमंत्री दादा भुसे यांच्या घरावर बिऱ्हाड मोर्चा ने जाऊन निवेदन देण्यात आले होते. त्यावेळी दिलेले आश्वासन सहा महिने उलटूनही पालकमंत्री भुसे व शासनाने पाळले नसल्याने एक जूनपासून जिल्हाधिकारी कार्यालयावर आंदोलन व उपोषण सुरू केले आहे.

मात्र अजूनही शासन लक्ष देत नसल्याने शासनाचे लक्ष वेधण्यासाठी बुधवारी मोर्चाचे आयोजन केले आहे. यात शेतकरी संघटना, स्वाभिमानी शेतकरी संघटना, प्रहार शेतकरी संघटना, तसेच विविध पक्षांचे पदाधिकारी सहभागी होणार आहेत.