नाशिक / गिरणार : एकीकडे जगभरात कोरोनाने थैमान घातले असल्याने याचा फटका सर्वच क्षेत्रांना बसला आहे. यातून नाशिकची द्राक्षेही सुटलेली नाहीत. द्राक्ष विकायला व्यापारी मिळत नाही, चुकून एखादा व्यापारी गवसला तर तोही कवडीमोल द्राक्षांची मागणी करीत असल्याची स्थिती आहे. त्यामुळे अक्षरश: वैतागून दुगाव येथील एका शेतकऱ्याने आपल्या तीन एकरांच्या द्राक्षबागेवर कुऱ्हाड चालविली आहे. त्यामुळे "एकीकडे कोरोनाचा घाव, त्यात मिळेना द्राक्षांना भाव' अशीच स्थिती जिल्ह्यातील बहुतेक द्राक्षबागायतदारांवर ओढावली आहे.
दुगावच्या शेतकऱ्याने द्राक्षबागेवर चालविली कुऱ्हाड
नाशिक तालुक्यातील पश्चिम पट्ट्यात असलेल्या दुगाव येथील शेतकरी मनोहर थेटे याने द्राक्ष काढणीस आलेल्या तीन एकर द्राक्षबागेवर कुऱ्हाड चालविली आहे. कोरोनाच्या संकटात द्राक्ष काढणीत मातीमोल झाल्याने, द्राक्ष घ्यायला व्यापारी मिळेना. त्यात डोक्यावर लाखोंचे कर्ज कसे फेडणार, या विवंचनेतून या शेतकऱ्याने द्राक्ष काढणीत असताना व्यथित होऊन उभ्या द्राक्षबागेवर कुऱ्हाड चालविली. कोरोनाच्या महामारीत अख्खे विश्व बेजार आहे. त्यात राज्यात दोनशेहून अधिक कोरोनाग्रस्त आहेत. त्यामुळे सर्वत्र भीतीचे वातावरण आहे. ऐन द्राक्ष काढणीच्या मोसमात व्यापारी आपापल्या राज्यात निघून गेले आहेत. अशा स्थितीत द्राक्षबागायतदार द्राक्ष देण्यासाठी वणवण फिरत आहेत.
मात्र व्यापारी मिळत नसल्याने या भांडवली पिकाचे बेदाणे करण्यासही काही शेतकऱ्यांनी पाऊल उचलले आहे. अशा स्थितीत दुगाव येथील मनोहर थेटे या शेतकऱ्याने उभ्या बागेवर कुऱ्हाड चालविली. आता ही द्राक्षे द्यायची कुठे, असा सवाल व्यक्त केला आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.