नाशिक : विषारी सर्प दंशाने शेतकरी महिलेचा मृत्यू

बाणगाव बुद्रुक (जि. नाशिक) : येथील महिलेचा शेतीकाम करीत असताना विषारी सर्पदंश झाल्याने मृत्यू झाला. सरला रवींद्र गोराडे (वय ३५) असे या महिलेचे नाव आहे. सरला गोराडे स्वतःच्या शेतात पत्र्याच्या घरात राहत होत्या. सायंकाळी नेहमीप्रमाणे त्या घराच्या अंगणात भांडी घासत असताना अचानक पाठीमागून विषारी कोब्राने दंश केल्याचे त्यांच्या लक्षात आले.

याबाबतची माहिती त्यांनी कुटुंबियांना दिल्यानंतर नांदगाव सरकारी रुग्णालयात दाखल करण्यात आले. परंतु, उपचारादरम्यान त्यांचा मृत्यू झाला. सरला गोराडे यांची घरची आर्थिक स्थिती बेताची आहे. तहसिलदारांनी शासनाच्या आपत्ती निवारण निधीतून गोराडे कुटुंबियांना आर्थिक मदत मिळवून देण्याची मागणी करण्यात आली आहे. त्यांच्या पश्‍चात पती, मुलगा, मुलगी असा परिवार आहे.