Onion : विंचूरमध्ये शेतकरी संतप्त; कमी दरामुळे कांदा लिलाव पाडले बंद

विंचूर (जि. नाशिक) : लासलगाव बाजार समितीच्या विंचूर उपबाजार आवारात कांद्याला लिलावामध्ये गुरुवारी (ता. १५) रोजी सकाळी पहिल्या सत्रात कमी दर पुकारल्यामुळे संतप्त शेतकऱ्यांनी लिलाव बंद पाडून सुमारे तासभर आंदोलन केले.

विंचूर उपबाजारात सकाळी शेतकऱ्यांचा उद्रेक पाहायला मिळाला. कांद्याचे लिलाव सुरू झाले. मात्र, कांद्याला लिलावात अवघे २०० ते ५०० रुपये इतका कमी भाव मिळाला. त्यामुळे शेतकरी संतप्त झाले आणि त्यांनी तत्काळ लिलाव बंद पाडले.

त्यानंतर बाजार समिती कार्यालयाला घेराव घातला. बुधवारी (ता. १४) तुलनेत गुरुवारी (ता. १५) ३०० ते ४०० रुपयांची घसरण झाली. त्यामुळे संतप्त शेतकऱ्यांनी लिलाव बंद पाडत प्रशासनाला वेठीस धरले.

या वेळी संचालक संदीप दरेकर, छबू जाधव, राजेंद्र बोरगुडे, सहायक सचिव प्रकाश कुमावत यांच्यासह लासलगाव पोलिस स्टेशनचे सहायक पोलिस निरिक्षक राहुल वाघ यांनी मध्यस्थी करत कांद्याचे लिलाव पूर्ववत करण्याची मागणी शेतकऱ्यांजवळ केली.

लिलाव झालेल्या वाहनांचे फेर लिलावात कांद्याचे बाजार भाव न सुधारल्यास आपले आंदोलन सुरू ठेवा. मात्र फेर लिलाव एकदा होऊन द्या, या तोडग्यानंतर फेर लिलावामध्ये १०० रुपयांनी वाढून बाजारभाव मिळाला. मात्र संचालक मंडळ गेल्यानंतर कांद्याच्या बाजारभावाची परिस्थिती नंतर ‘जैसे थे’ झाल्याचे चित्र पाहायला मिळाले.

तेलंगणात दर अधिक मग महाराष्ट्रात का नाही?

शेतकऱ्यांची बाजारभावातून उत्पादन खर्च तर सोडा वाहतूक व मजुरी ही निघत नसल्याची खंत आहे. कांद्याला तेलंगणातील हैदराबाद बाजार समितीत सतराशे ते दोन हजार भाव मिळणार असल्याने हे दर महाराष्ट्र राज्यात पण जाहीर झाले पाहिजे, अशी अपेक्षा शेतकऱ्यांनी यावेळी बोलून दाखवली.

कांद्याला तीन हजार रुपये हमीभाव द्या. अतिवृष्टीमुळे कांदा नुकसानीची त्वरित भरपाई खात्यात जमा करा. अल्प दराने विक्री केलेल्या कांद्यास अनुदान द्या, अशा मागण्या आता शेतकरी करत आहेत.