नाशिक : शेतकऱ्यांनी लोकवर्गणीतून बनवला रस्ता

इगतपुरी (जि. नाशिक) : ग्रामीण भागातील शेतकऱ्यांना समृद्ध करण्यासाठी ग्रामीण रस्ते म्हणजे जीवनवाहिनी ( Lifeline) आहे. मात्र नेमकी हिच सुविधा नसेल तर शेतकऱ्यांना आपला दर्जेदार शेतीमाल बाजारपेठेत पोहोचवता येत नाही. यामुळे निर्माण होणारे नैराश्य अप्रगत करीत असते. या सगळ्या पार्श्वभूमीवर नागोसली (ता.इगतपुरी) (Igatpuri) येथे शेतकऱ्यांनी एकत्र येत लोकवर्गणी आणि श्रमदानातून (Public Participation) रस्त्याचे काम केले आहे.

गावापासून ते स्मशानभूमी भागात जाणाऱ्या एक किलोमीटरच्या रस्त्याच्या कामाची गेल्या २० वर्षांपासून प्रतीक्षा होती. मात्र या परिसरातील शेतकऱ्यांना विविध अडचणींचा सामना करावा लागत होता. त्यानुसार येथील शेतकऱ्यांनी स्वतः पुढाकार घेऊन नागोसली गाव ते स्मशानभूमी रस्त्याचे काम पूर्ण केले आहे.

लोकवर्गणी काढून केलेल्या रस्त्यामुळे अनेक शेतकऱ्यांना फायदा होणार असून स्मशानभूमीकडे जायला चांगला मार्गही मिळणार आहे. या रस्त्याच्या कामासाठी शेतकरी ज्ञानेश्वर जोंधळे, शाम शिंदे, देवराम राऊत, पोलिस पाटील कुंडलिक ताठे, कैलास ताठे, दत्तू शिंदे, गजीराम जोंधळे, संजय होले, सुखा होले, गिरीधर शिंदे, राजू शिंदे, जयेश जोंधळे, गोविंद रातड, माया शेलार, रामदास होले आदी शेतकऱ्यांनी पुढाकार घेऊन काम पूर्ण करून घेतले. या रस्त्याच्या भक्कम कामासाठी शासनाच्या निधीतून काम होणे आवश्यक असल्याने नाशिकचे पालकमंत्री छगन भुजबळ (Chhagan Bhujbal) यांना साकडे घालण्यात येणार असल्याचे शेतकऱ्यांनी सांगितले.