द्राक्ष व्यापाऱ्याच्या गोदामाला आग लागून लाखांचे नुकसान

निफाड (जि.नाशिक) : मानोरी फाटा येथील द्राक्ष व्यापाऱ्याच्या गोडाऊनला आग लागल्याची घटना आज (ता. २७) पहाटे घडली. आगीची माहिती मिळताच अग्निशमन दलाच्या गाड्या घटनास्थळी पोहोचून अग्निशमन दलाच्या जवानांनी ही आग आटोक्यात आणली. आगीचे कारण अद्याप समजू शकलेले नाही.

मानोरी फाटा येथील द्राक्ष व्यापारी संदिप डुकरे यांच्या गोडाऊनला आग लागल्याची घटना आज पहाटे घडली. पहाटे फिरण्यासाठी बाहेर पडलेल्या नागरिकांच्या लक्षात ही बाबत आल्याने त्यांनी तात्काळ संदिप डुकरे यांना कळविले. येवला येथील अग्निशमन दलाच्या जवानांनी ही आग आटोक्यात आणली. या आगीत व्यापाऱ्याचे प्रचंड नुकसान झाले आहे.

द्राक्ष क्रेट आणि पॅकिंग पुठ्ठे यांची साठवणूक या गोदामात असल्याने आग मोठ्या प्रमाणात पसरली होती. आगीचे कारण अद्याप समजू शकलेले नाही. अठरा हजार क्रेट, पॅकिंग टेप, पुठ्ठे, वजनकाटे, एक मोटारसायकल आदी साहित्य जळून खाक झाले आहे. अंदाजे 20 लाख रुपयांचे नुकसान झाल्याचे त्यांनी सांगितले आहे.