नाशिक : ओझर विमानतळाहून मेट्रो शहरांशी विमानसेवेच्या माध्यमातून जोडण्याच्या प्रक्रियेला आणखी गती मिळाली असून, स्पाइस जेट विमान कंपनीने दिल्ली, हैदराबादपाठोपाठ आता बेंगळुरूला विमानसेवा सुरू करण्याचा निर्णय घेतला आहे. हैदराबाद-बेंगळुरू हवाईसेवेमुळे नाशिकमधील माहिती व तंत्रज्ञान उद्योगाला चालना मिळण्याची दाट शक्यता निर्माण झाली आहे.
सध्या ओझर विमानतळावरून नाशिक-अहमदाबाद, नाशिक-हैदराबाद व नाशिक-पुणे विमानसेवा सुरू आहे. लॉकडाउनमुळे हवाईसेवा खंडित झाली होती. आता पुन्हा नव्या दमाने सेवा सुरू करताना स्पाइस जेट कंपनीने सेवेचा विस्तार करण्याचा निर्णय घेतला. २० नोव्हेंबरपासून दिल्ली, हैदराबाद हवाई सेवा सुरू करण्याचा निर्णय गेल्या आठवड्यात घेतला होता. त्यात बदल करण्यात आला असून, २० नोव्हेंबरपासून हैदराबाद व बेंगळुरू सेवा सुरू होणार आहे. २५ नोव्हेंबरपासून दिल्ली सेवा सुरू होईल. विमान तिकिटाचे दर कंपनीने जाहीर केले आहेत. उडान-२ अंतर्गत विमानसेवा सुरू होणार आहे. हवाई सेवा नित्याने सुरू राहिल्यास नाशिकच्या विकासाचा मार्ग खुला होईल.
आयटी उद्योगाला चालना
देशातील मेट्रो शहरांशी जोडणारी सेवा नसल्याने माहिती व तंत्रज्ञान उद्योग स्थिरावत नसल्याची भावना उद्योजकांमध्ये आहे. या निर्णयामुळे नाशिक देशातील मेट्रो शहरांशी जोडले जाईल. हैदराबाद व बेंगळुरूमध्ये माहिती व तंत्रज्ञानाशी संबंधित कंपन्या मोठ्या असल्याने उद्योग-व्यवसायाला चालना मिळेल. देशांतर्गत सेवा वाढल्यानंतर ओझर येथील विमानतळाला आंतरराष्ट्रीय विमानतळाचा दर्जा प्राप्त होण्यास मदत होईल. यापूर्वी केंद्र सरकारने आंतरराष्ट्रीय कुरिअर हबमध्ये ओझर विमानतळाचा समावेश केला आहे.
अशी वेळ, असे दर
२० नोव्हेंबरपासून हैदराबाद-नाशिक सेवा सुरू होईल. हैदराबाद येथून सकाळी १०.३५ला नाशिककडे उड्डाण होईल. दुपारी १२ वाजून पाच मिनिटांनी ओझर विमानतळावर पोचेल. ओझरहून दुपारी १२.३५ ला हैदराबादकडे उड्डाण झाल्यानंतर दुपारी दोन वाजून पाच मिनिटांनी पोचेल. बेंगळुरूवरून सकाळी ११.२० ला ओझरकडे उड्डाण होईल. दुपारी १२.२५ ला पोचेल. नाशिकहून १२.५५ला बेंगळुरूकडे उड्डाण होईल. दुपारी दोन वाजून पाच मिनिटांनी पोचेल. २५ नोव्हेंबरपासून दिल्ली सेवा सुरू होईल. दुपारी तीन वाजून पंधरा मिनिटांनी ओझरकडे उड्डाण होईल. सायंकाळी पाच वाजून पाच मिनिटांनी पोचेल. सायंकाळी पाच वाजून ३५ मिनिटांनी दिल्लीकडे उड्डाण होईल. सात वाजून २५ मिनिटांनी दिल्लीत पोचेल. हैदराबाद ते नाशिकसाठी तीन हजार १६० रुपये प्रतिप्रवासी तर परतीच्या प्रवासासाठी तीन हजार ३८५ रुपये दर आहेत. बेंगळुरू-नाशिकसाठी तीन हजार ६६२ रुपये दर निश्‍चित करण्यात आले आहेत. दिल्लीसाठी चार हजार ६० रुपये दर आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.