नाशिककरांनो...! यंदा गणेशोत्सवासाठी महापालिकेची परवानगी बंधनकारक...'या' संकेतस्थळावर करा अर्ज..

नाशिक : पुढील महिन्यात होणाऱ्या गणेशोत्सवासाठी महापालिकेतर्फे ऑनलाइन परवानगी देण्याचे धोरण आखण्यात आले असून त्यासाठी संकेतस्थळ जाहीर केले आहे. कोरोनाच्या पार्श्‍वभूमीवर यंदा मंडळांची संख्या घटण्याची शक्यता आहे. गर्दीच्या ठिकाणी मंडप उभारण्यास परवानगी दिली जाणार नाही. मंडळांविरोधात तक्रार करण्यासाठी नागरिकांना हेल्पलाईन उपलब्ध करून दिली जाणार आहे. 

या संकेतस्थळावर अर्ज करता येणार

उच्च न्यायालयाने गणेशोत्सव मंडळांना उत्सव साजरा करण्यासाठी महापालिकेची परवानगी बंधनकारक केली आहे. उत्सव साजरा करताना मंडळांकडून मंडप टाकले जातात. त्यासाठी शासनाने नियमावली आखून दिली आहे. मंडळांना परवानगीसाठी http:/nmcfest.nmc.gov.in या संकेतस्थळावर अर्ज करता येणार आहे. सहा विभागीय कार्यालयांमध्ये परवानगीसाठी एक खिडकी योजना दरवर्षी राबविली जाते. मंडप उभारण्यासाठी अर्ज करताना मंडपाचा स्थळदर्शक नकाशा, धर्मादाय उपायुक्तांकडील नोंदणी प्रमाणपत्र, पोलिस, वाहतूक, अग्निशमन या तिन्ही विभागाकडील ना हरकत प्रमाणपत्र, सार्वजनिक मंडळाचे नाव, पत्ता व मंडळाच्या पदाधिकाऱ्यांची नावे सादर करावी लागणार आहे. विभागीय अधिकारी अर्जांची छाननी करतील. पोलिस, शहर वाहतूक शाखा व अग्निशमन विभागाकडून ना हरकत दाखला मिळाल्यानंतर उत्सवापूर्वी सात दिवसांआधी प्रमाणपत्र दिले जाईल, अशी माहिती उपयुक्त प्रदीप चौधरी यांनी दिली. 

हेही वाचा > झोळीत असतानाच नियतीने हिरावले पितृछत्र...आज त्याच लेकीच्या यशाने माऊलीच्या होते डोळ्यात आनंदाश्रू

अशी आहे नियमावली 

- मंडप व कमान उभारण्यासाठी रस्त्यांवर खड्डे न करता वाळूच्या ड्रमचा वापर 
- मंडपापासून १५ मीटर अंतरात रोषणाई 
- मंडळांच्या जाहिरातींवर वाणिज्य दराने करआकारणी 
- महापालिका, पोलिस वाहतूक शाखा, अग्निशमन विभागामार्फत प्रत्यक्ष स्थळ निरीक्षण 
- विनापरवानगी रस्ता खोदल्यास दंड 
- महापालिकेच्या वीज खांबावरून जोडणी घेतल्यास कारवाई 

हेही वाचा > VIDEO : आश्चर्यच! एकीकडे रुग्णांसाठी खाटांची वणवण...अन् दुसरीकडे आयसोलेशन कोचेसचा प्रशासनाला विसर?

संपादन - किशोरी वाघ