गृहकर्ज घेणे झाले महाग; ग्राहकांच्या खिशाला बसणार झळ

नाशिक रोड : बँकांकडून (bank loan) कर्ज घेतेवेळी ग्राहकांना इक्विटेबल मॉर्गेज (गहाण फी) केवळ एक हजार ३०० रुपये भरावे लागत होती. आता ती कर्जाच्या अर्धा टक्का स्टॅम्प ड्यूटी स्वरूपात केली आहे. यामुळे कर्ज घेणाऱ्या ग्राहकांच्या खिशाला झळ बसणार आहे. या संदर्भात बांधकाम व्यावसायिकांसह कर्ज घेणाऱ्या ग्राहकांनी ही फी रद्द करावी, अशी मागणी केली आहे. (Getting-home-loan-can-be-expensive-nashik-marathi-news)

इक्विटेबल मॉर्गेज फी आता कर्जाच्या अर्धा टक्का

गृहकर्ज घेतेवेळी इक्विटेबल मॉर्गेज म्हणजेच गहाणखताची फी एक हजार ३०० रुपये भरावी लागत होती. आता ती वाढवून कर्ज घेतल्याच्या अर्धा टक्का फी भरावी लागणार आहे. जितके कर्ज असणार त्याच्या अर्धा टक्का फी भरावी लागणार असल्याने कर्ज घेणाऱ्या ग्राहकांच्या खिशाला हा भुर्दंड बसणार आहे. यामुळे कर्ज घेणाऱ्या ग्राहकांसह बांधकाम व्यावसायिकांनी चिंता व्यक्त केली आहे. कोरोना काळात नोकरी-व्यवसाय रोजगाराला खीळ बसली आहे. त्यातच आता इक्विटेबल मॉर्गेजच्या नावाखाली अर्धा टक्का स्टॅम्प ड्यूटी स्वरूपात चार्जेस आकारले जाणार आहेत. यामुळे घर घेणे आणखी महाग झाल्याची प्रतिक्रिया ग्राहक व बांधकाम व्यावसायिक व्यक्त करीत आहेत.

इक्विटेबल मोर्गेजची फी आधी एक हजार ३०० रुपये होती. आता ती कर्ज रकमेच्या अर्धा टक्का व तीनशे रुपये अशी झाली आहे. याचा भुर्दंड ग्राहकांच्या खिशाला बसणार आहे. बांधकाम व्यवसायावर याचा दूरगामी परिणाम होणार आहे. राज्य शासनाने विचार करून इक्विटेबल मॉर्गेज फी पुन्हा एक हजार ३०० रुपये करावी. -हेमंत गायकवाड, बांधकाम व्यावसायिक