नाशिक जिल्ह्याला मुसळधार पावसाने झोडपले; अनेक गावांमध्ये पुर परिस्थिती

नाशिक : गेल्या तीन दिवसांपासून नाशिक शहरासोबत जिल्ह्यात पावसाचे जोरदार आगमन झाले आहे. जिल्ह्यातील जवळपास सर्वच धरणाच्या पाणलोट क्षेत्रात चांगला पाऊस सुरू आहे. गंगापुर, दारणा, वालदेवी, पालखेड, पुनद, मुकने, कादवा, धरणांतून पाण्याचा विसर्ग सुरु असल्याने नद्याही दुथडी भरुन वाहू लागल्या आहेत. अनेक ठिकाणी पुर परिस्थिती निर्माण झाली असून नदी- नाल्यांवरील पुल पाण्याखाली गेले आहेत.

नाशिक जिल्ह्याला मुसळधार पावसाने झोडपले

जिल्ह्यातील ४ महत्वाच्या धरणांमधून मोठ्या प्रमाणात पाण्याचा विसर्ग केला जात असल्याने मुख्य नद्यांसह उप नद्यांना पुर आले आहेत. मुसळधार पावसामुळे ग्रामीण भागात अनेक ठिकाणी नद्यांवरील पुल पाण्याखाली गेले आहेत.

दिंडोरी तालुक्यातील ६ ते ७ रस्ते पाण्याखाली गेले असून अनेक गावांचा संपर्क यामुळे तुटला आहे. त्र्यंबकेश्वर, देवळा आणि निफाड तालुक्यात प्रत्येकी १ पुल पाण्याखाली गेल्याने नागरिकांपुढे मोठ्या समस्या उभ्या ठाकल्या आहेत.

- जिल्ह्यातील धरणांमधून सद्यस्थितीत होत असलेला विसर्ग

दारणा धरण - 15,088 क्यूसेक

गंगापूर धरण - 10,000 क्यूसेक

कडवा धरण - 6,712 क्यूसेक

नांदूरमधमेश्वर धरण - 41,613 क्यूसेक

होळकर ब्रीज - 11,210 क्यूसेक