Nashik News : नैताळे यात्रौत्सवात अवैध मद्य विक्री जोरात; संतप्त महिलांचा पोलिस चौकीवर मोर्चा

Nashik News : येथील श्री मतोबा महाराजांच्या यात्रोत्सवात विनापरवाना मद्य विक्री होत असल्याने रहिवाशांना मोठ्या त्रासाला सामोरे जावे लागत आहे. परिसरातील संतप्त महिलांनी रविवारी (ता. २८) सकाळी दहाला नैताळे पोलिस चौकीवर मोर्चा नेऊन पोलिसाना निवेदन दिले.

अवैध मद्य विक्री तत्काळ बंद करावी व विक्रेत्याकडून होणारी दमबाजीविरुद्ध कारवाई करावी, अशी मागणी निवेदनात केली आहे. ()

श्री मतोबा महाराजांचा यात्रोत्सव १५ दिवस सुरू राहणार आहे. यात्रोत्सवाच्या पश्चिमेकडील आदिवासी बेघर, झोपडपट्टी परिसरात मद्य विक्री जोरात सुरू असल्याने रहिवाशांना मोठ्या त्रासाला सामोरे जावे लागत आहे. शेवटी संतप्त महिलांनी नैताळे पोलिस चौकीवर मोर्चा नेला व मद्य विक्रीच्या त्रासाची कैफियत मांडली.

दरम्यान, ग्रामसभेत दारूबंदीचा ठराव सर्वानुमते मंजूर झाला आहे. तरीही मद्य विक्री होत असल्याने ग्रामस्थांनी आश्चर्य व्यक्त केले. शिवाय मद्य विक्री करणारे दमबाजी करीत असल्याचे महिलांनी सांगितले. येथील विना परवाना मद्य विक्री करणाऱ्या व्यक्तीवर का कारवाई होत नाही, असा प्रश्न ग्रामस्थांना पडला आहे.

निवेदनावर दिव्या सुराशे, अश्विनी माळी, पूजा सुराशे, रेखा सुराशे, पूजा सुराशे, अश्विनी माळी, दिव्या महेश सुराशे, ज्योती पगारे, पूजा देविदास सुराशे, सुवर्णा सुराशे, भारती सुराशे, जयश्री सुराशे, सुनीता गांगुर्डे, मीरा पवार, वर्षा पवार, शाहून रफिक शेख, सीता माळी, मनीषा पवार, संध्या कुसाळकर, अनिता सुराशे आदींसह अनेक महिलांच्या स्वाक्षऱ्या आहेत.

''निफाड पोलिसांना महिलांचे निवेदन मिळाले असून, त्याबाबत चौकशी केली जात आहे. दोषींवर कारवाई केली जाईल.''-नंदकुमार कदम, पोलिस निरीक्षक, निफाड