शहरातील सराईत गुन्हेगार जेरबंद; गावठी पिस्तुल, 2 जिवंत काडतूस जप्त

मालेगाव (जि. नाशिक) : शहरातील नागछाप झोपडपट्टी सिमेंट रस्त्यावर शहर पोलिसांनी सापळा रचून शाहीद अख्तर शकील अहमद उर्फ अख्तर काल्या (वय ३५, रा. अख्तराबाद, फार्मसी कॉलेज मागे) या सराईत गुन्हेगाराला जेरबंद केले.

त्याचा साथीदार व अन्य एक संशयित शेख रब्बानी शेख कादीर (वय ३२, रा. गुलशेरनगर) हा मात्र फरार झाला. पोलिसांनी अख्तर काल्याजवळून २५ हजार रुपये किंमतीची एक गावठी पिस्तुल व चारशे रुपये किंमतीचे दोन जिवंत काडतूस असा २५ हजार ४०० रुपयांचा ऐवज जप्त केला. (Imprisoned innkeepers in city Gavathi pistol 2 live cartridges seized Nashik news)

पोलिस निरीक्षक सुरेश घुसर, उपनिरीक्षक सुनील आहेर यांना दोघे संशयित सराईत गुन्हेगार नागछाप झोपडपट्टी भागात फिरत असल्याची माहिती मिळाली. अपर पोलिस अधिक्षक चंद्रकांत खांडवी यांच्या मार्गदर्शनाखाली श्री. घुसर, श्री. आहेर, पोलिस नाईक आत्माराम पाटील, विशाल गोसावी, अमोल शिंदे व ठाकूर यांनी सापळा रचून अख्तर काल्याला अटक केली.

रब्बानी फरार झाला. पथकाने त्याची झडती घेतली असता त्याच्याजवळ गावठी पिस्तुल व काडतूस मिळून आले. दोघेजण सराईत गुन्हेगार असून पोलिस त्यांच्या मागावर होते. शहर पोलिस ठाण्यात पोलिस नाईक पाटील यांच्या तक्रारीवरुन दोघांविरुध्द भारतीय हत्यार कायदा कलमान्वये अवैधरित्या विनापरवाना शस्त्र बाळगल्याचा गुन्हा दाखल करण्यात आला आहे. अख्तर काल्याला अटक केल्यानंतर उपअधिक्षक प्रदीपकुमार जाधव व पोलिस निरीक्षक घुसर यांनी त्याची कसून चौकशी केली. फरार झालेल्या रब्बानीचा पोलिस शोध घेत आहेत.