Nashik: देवदीपावलीनिमित्त उजळले जगदंबामातेचे मंदिर! वणीत किन्नरपंथीय समुहाचे प्रमुख भास्कर गुरू यांची शिष्यांसह पूजा

वणी : येथील जगदंबामाता मंदिरात देवदीपावलीनिमित्त किन्नरपंथीय समुहाचे प्रमुख भास्कर गुरू यांनी शिष्य व भाविकांसमवेत शेकडो दिवे प्रज्वलीत केले व फटाक्यांची आतिषबाजी केली. (Jagdambamata temple lit up on occasion of Devdeepavali Worship of Bhaskar Guru head of Kinnerpanthiya group in Vani with his disciples Nashik)

भास्कर गुरू यांनी सप्तशृंगी गडावर आदिमाया सप्तशृंगीदेवीस नवमहावस्त्र, खन-ओटी, फळे अर्पण करून महापूजा केली. नतर सभामंडपातील यज्ञ कुंडासभोवती शेकडो दीवे लावून दीपोत्सव केला.

त्यानंतर भास्कर गुरू सहकारी व शिष्यांनी वणीच्या जगदंबामाता मंदिरात येऊन महावस्त्र, ओटी-खन, पाच फळे, धान्य आदी अर्पण केले.यानंतर श्री जगदंबामाता मंदिर, सभामंडप, तलाव परिसरात संताजी युवक मित्र मंडळ व एकलव्य फ्रेंड सर्कलच्या सदस्यांच्या मदतीने पाच हजारावर दिवे प्रज्वलीत केले.

नंतर आदिमाया जगदंबेची महाआरती करण्यात आली. शोभीवंत फटाक्यांची आतिषबाजी करण्यात आली. जगंदबामाता मंदिर ट्रस्टचे अध्यक्ष राजेंद्र थोरात, विश्वस्त रवींद्र थोरात, राकेश थोरात, सुनील थोरात यांनी ट्रस्टतर्फे भास्कर गुरू यांचे स्वागत केले.

देवी मंदिर व सभामंडप, गणेश मंदिर, संतोषीमाता मंदिर, महादेव मंदिर, तलावाचा परिसर हजारो दिव्यांच्या प्रकाशाने उजळून गेला होता. हे दृश्य मोबाईलमध्ये टिपण्यासाठी भाविकांची गर्दी झाली होती.

दरम्यान, बुधवार (ता. १३)पासून मार्गशीर्ष मासारंभ झाला. मासाचा पहिला दिवस प्रतिपदा, तोच देव दिवाळी म्हणून साजरी केली जाते. आपण अश्विन- कार्तिक महिन्यांत दिवाळी साजरी करतो. तेव्हा चार्तुमास सुरू असतो. तेव्हा भगवान विष्णू निद्रावस्थेत असतात.

कार्तिक शुक्ल एकादशीला ते जागे होतात. त्यावेळी चार्तुमासही संपतो, म्हणून मार्गशीर्ष महिन्यात ही खास देवांची दिवाळी साजरी केली जाते. त्यानिमित्त सर्व देवदेवतांचे स्मरण हा देवदिवाळीचा हेतू असतो.