JEE Mains Exam : रसायन, भौतिकशास्‍त्रच्‍या प्रश्‍नांनी फोडला घाम!

नाशिक : जानेवारी सत्रातील जॉईंट एन्‍स्‍ट्रान्‍स एक्‍झाम (जेईई) मेन्‍स परीक्षेला मंगळवार (ता.२४) पासून सुरवात झाली. संगणकावर आधारित (कॉम्‍प्‍युटर बेस्‍ड टेस्‍ट) सत्र पद्धतीने ही परीक्षा पार पडत असून, नाशिकमधील चार केंद्रांवर सुमारे सोळा हजाराहून अधिक विद्यार्थी परीक्षेला सामोरे जाणार आहेत.

पहिल्‍या दिवशी सुमारे दोन हजाराहून अधिक विद्यार्थ्यांनी परीक्षा दिली. रसायनशास्‍त्र, भौतिकशास्‍त्र विषयाच्‍या प्रश्‍नांनी बहुतांश विद्यार्थ्यांचा घाम फोडला होता. (JEE Mains Exam january semester started nashik news)

इंडियन इन्‍स्‍टिट्यूट ऑफ टेक्‍नॉलॉजी (आयआयटी) व यांसारख्या राष्ट्रीय स्‍तरवरील संस्‍थांत प्रवेशासाठी जेईई मेन्‍स परीक्षा घेतली जाते आहे. नॅशनल टेस्टिंग एजन्‍सी (एनटीए) यांच्‍यातर्फे राष्ट्रीय पातळीवर या परीक्षेचे आयोजन केले आहे.

मंगळवारपासून परीक्षेला सुरवात झालेली असून, येत्‍या १ फेब्रुवारीपर्यंत सत्र पद्धतीने ही परीक्षा पार पडणार आहे. २६ आणि २७ जानेवारी असे दोन दिवस सार्वजनिक सुट्या राहातील.

दरम्‍यान नाशिकमध्ये चार केंद्रांवर ही परीक्षा होते आहे. ॲपेक्‍स, मेट भुजबळ नॉलेज सिटी, फ्युचर टेक आणि बेबीज अशा चार केंद्रांवर होत असलेल्‍या या परीक्षेला सुमारे सोळा हजाराहून अधिक विद्यार्थी सामोरे जात आहेत.

हेही वाचा : प्राप्तिकर उत्पन्न सवलत मर्यादा वाढणार?

परीक्षेसाठी अर्ज केलेल्‍या विद्यार्थ्यांना ऑनलाइन माध्यमातून प्रवेशपत्र उपलब्‍ध करून दिले आहेत. या प्रवेशपत्रावर परीक्षेचा तपशील, तारीख वेळ व परीक्षा केंद्रांची माहिती उपलब्‍ध करून दिलेली आहे.

कसून तपासणीनंतर विद्यार्थ्यांना प्रवेश

कुठलाही गैरप्रकार टाळण्यासाठी परीक्षा केंद्रातील संगणक कक्षात सोडण्यापूर्वी विद्यार्थ्यांची कसून तपासणी केली जाते आहे. कागदपत्र पडताळणी करून घेताना एनटीएने सूचित केलेल्‍या दिशानिर्देशाचे पालन करतांना विद्यार्थ्यांना प्रवेश दिला जातो आहे. कोविड-१९ च्‍या पार्श्वभुमिवरदेखील खबरदारी बाळगली जाते आहे.