मालेगावी कलंत्री भारत गॅस एजन्सीत पिस्तुल, चाकूच्या धाकाने लाखाची लुट

मालेगाव (जि. नाशिक) : शहरातील मालेगाव - सटाणा रस्त्यावरील सोयगाव फाट्यावरील कलंत्री भारत गॅस एजन्सीत पिस्तुल, चाकूचा धाक दाखवून दोघा लुटारूंनी लाखाची लुट केली. दुकानात असलेल्या चौघा कर्मचाऱ्यांना पिस्तुलची दहशत दाखवून दुकानात शिरून केलेल्या या जबरी लुटीमुळे खळबळ उडाली आहे. सोमवारी (ता.१९) सायंकाळी हा प्रकार घडला. (Kalantri Bharat Gas Agency looted with pistol knife worth lakhs nashik Latest Marathi News)

सोयगाव फाट्यावरील कलंत्री गॅस एजन्सीत ट्रॅकसुट व चेहरा झाकण्यासाठीची टोपी परिधान करून दुचाकीवरून दोन लुटारू आले. त्यांनी चौघा कर्मचाऱ्यांना पिस्तुल व चाकूचा धाक दाखवून खाली बसविले. एकाने त्यांच्यावर पिस्तुल रोखत लक्ष ठेवले. यावेळेत दुसऱ्या लुटारूने ड्रावर मध्ये जमा असलेली एक लाख ५८० रूपये जबरीने लुटून फरार झाले.

लुटारू मराठी भाषेत दमबाजी करत होते. त्यावरून ते स्थानिक व माहितगार असल्याचा संशय आहे. हा सर्व थरार सिसिटीव्हीत कैद झाला आहे. एजन्सीतील संगणक चालक अजय बाबाजी गोरे ( २८, रा. श्रीरामनगर) याच्या तक्रारीवरून छावणी पोलिस ठाण्यात जबरी लुटीचा व शस्त्रास्त्र कायद्यान्वये गुन्हा दाखल करण्यात आला आहे.

घटनेचे वृत्त समजताच अपर पोलीस अधीक्षक चंद्रकांत खांडवी, उपअधीक्षक प्रदीपकुमार जाधव, पोलिस निरीक्षक संजय गायकवाड यांच्यासह स्थानिक गुन्हा शाखा व विशेष पथकाने भेट देत पाहणी केली. पोलिस संशयीतांच्या शोधासाठी सिसिटीव्हीची बारकाईने पाहणी करीत आहे. गेल्या आठवड्यात पाच घरफोडींचे प्रकार घडले. मोबाईल व रस्ता लुट पाठोपाठ थेट दुकानात शिरून लुटण्याचा प्रकार घडल्याने गुन्हेगारांचे मनोधैर्य वाढले आहे. पोलिसांनी त्यांच्या नांग्या वेळीच ठेचण्याची गरज आहे.