Nashik Balaji investment Fraud Case: ‘बालाजी’ गुंतवणूक फसवणूक प्रकरणातील लतिकाचे हैदराबाद कनेक्शन!

नाशिक : अल्प गुंतवणुकीवर बिनव्याजी दोन लाख रुपयांपर्यंतचे कर्ज देण्याचे आमिष दाखवून शेकडो जणांची फसवणूक केल्या प्रकरणाचे धागेदोरे हैदराबादपर्यंत पोहोचले आहेत.

या घोटाळ्याची मुख्य सूत्रधार संशयित लतिका खालकर उर्फ लावण्या पटेल हिचे हैदराबादेतील पंचतारांकित हॉटेलमध्ये जात असल्याचे तपासातून समोर आले आहे.

परंतु चौकशीमध्ये अजूनही लतिका पोलिसांची दिशाभूल करण्याचा प्रयत्न करीत असल्याने तिच्या पोलिस कोठडीत आणखी दोन दिवसांची वाढ करण्यात आलेली आहे. (Latikas Hyderabad connection in Balaji investment fraud case nashik crime news)

पाथर्डी फाटा परिसरात असलेल्या बालाजी फायनान्शिअल सर्व्हिसेस प्रा. लि. या कंपनीविरोधात इंदिरानगर पोलिसांत गेल्या ३१ डिसेंबरला आर्थिक फसवणुकीचा गुन्हा दाखल करण्यात आला असून, गुन्ह्याचा तपास शहर आर्थिक गुन्हे शाखा करीत आहे.

याप्रकरणी आर्थिक गुन्हे शाखेने मुख्य संशयित लतिका हिच्यासह नवनाथ खालकर, सुगर औटे, विनोद जिनवाल उर्फ विकी, मोईनअली सय्यद, उत्तम जाधव यांना अटक केली. यात लतिका वगळता उर्वरित संशयित मध्यवर्ती कारागृहात न्यायालयीन कोठडीत आहे.

लतिकाचे हैदराबाद येथील पंचतारांकित हॉटेलमध्ये बालाजी कंपनीचे संचालक कृष्णराव रेड्डी, माधवन कृष्णन, श्रीनिवासन यांच्यासमवेत आर्थिक व्यवहारांदर्भात बैठका होत होत्या. लतिका पोलिसांची दिशाभूल करण्याचाही प्रयत्न करत आहे.

पोलिस याप्रकरणात फरारी संशयितांचा शोध घेत आहे. पोलिसांकडे सुमारे साडेचारशे ते पाचशे गुंतवणूकदारांच्या तक्रारी आलेल्या आहेत.

संबंधित गुन्ह्याचा तपास पोलिस आयुक्त संदीप कर्णिक, आर्थिक गुन्हे शाखेचे उपायुक्त प्रशांत बच्छाव यांच्या मार्गदर्शनाखाली पोलिस निरीक्षक सुरेश आव्हाड, पोलिस निरीक्षक सचिन पिसे करीत आहेत.