Nashik Kalaram Mandir Maha Aarti: उद्धव ठाकरे कुटुंबियांच्या उपस्थितीत श्री काळाराम मंदिरात महाआरती

नाशिक : शिवसेना (उबाठा) गटाचे प्रमुख उद्धव ठाकरे व कुटुंबियांच्या उपस्थितीत आज पंचवटीतील प्रसिद्ध श्री काळाराम मंदिरात सायंकाळी महाआरती झाली.

यावेळी ठाकरे कुटुंबाने संकल्पपूजनही केले. विश्‍वस्त मंडळातर्फे ठाकरे कुटुंबियांचा सत्कार करण्यात आला.

जिल्हाभरातील हजारो शिवसैनिक श्री काळाराम मंदिर पूर्व दरवाजा येथे उपस्थित होते. महाआरतीनंतर श्री. ठाकरे यांच्या मोटारींचा ताफा रामतीर्थाकडे मार्गस्थ झाला. (Maha Aarti at Shri Kalaram Mandir in presence of Uddhav Thackeray family nashik political news)

श्री काळाराम देवस्थानचे नरेश पुजारी, मंगेश पुजारी, प्रणव पुजारी यांनी पौरोहित्य केले. महाआरती व संकल्पपूर्तीनंतर विश्‍वस्तांसह उद्धव ठाकरे, रश्‍मी ठाकरे, आदित्य ठाकरे यांचा सत्कार करण्यात आला.

मंदार जानोरकर, ॲड. अजय निकम, शुभम मंत्री आदी विश्‍वस्त उपस्थित होते. ठाकरे परिवारासोबत शिवसेना नेते खासदार संजय राऊत, आमदार नरेंद्र दराडे, जिल्हाप्रमुख विजय करंजकर यांच्यासह पक्षाचे पदाधिकारी, शिवसैनिक मोठ्या संख्येने उपस्थित होते.

छबी टिपण्यासाठी चढाओढ

पूजेनंतर ठाकरे कुटुंब राममंदिराच्या पूर्व दरवाजाने बाहेर पडताच याठिकाणी मोठ्या संख्येने उपस्थित शिवसैनिकांनी जल्लोष केला.

उद्धव ठाकरे यांची छबी मोबाईलमध्ये घेण्यासाठी कार्यकर्त्यांत मोठी चढाओढ लागली होती. महिला शिवसैनिकही उपस्थित होत्या. आदित्य ठाकरे यांनी गाडीबाहेर येत शिवसैनिकांच्या अभिवादनाचा स्वीकार केला.