भगवी शाल घालून महादेव जानकरांचा अंकाई किल्ल्यावर मुक्काम?

नाशिक : अंगावर भगवी शाल....मनमाडच्या अंकाई किल्ल्यावर मुक्तपणे संचार करतानाचा माजी मंत्री महादेव जानकारांचा (mahadev jankar) एक व्हिडिओ सध्या व्हायरल होताना दिसत आहे. मात्र अचानक आणि गुपचूप ते या किल्ल्यावर दोन दिवस का थांबले? त्यांच्या मनात काय असावं? असे अनेक प्रश्न याबाबत निर्माण होत आहेत. कारण महादेव जानकर यांनी त्यांच्या या मुक्कामाबाबत गुप्तता पाळली होती. (Mahadev-Jankar-secret-stay-at Ankai-fort-Manmad-nashik-marathi-news)

महादेव जानकरांचा मनमाडच्या अंकाई किल्यावर गुपचुप मुक्काम?

माजी मंत्री महादेव जानकर यांनी मनमाडमध्ये असलेल्या अंकाई किल्ल्यावरील अगस्तीमुनींच्या आश्रमात 2 दिवस मुक्काम केला असे समजते. यावेळी त्यांनी किल्ल्यावर असलेले ऋषी अगस्तीमुनींच्या मंदिर आणि मोठे बाबाच्या दरगाह या ठिकाणी जाऊन दर्शन घेतले. तसेच त्यांनी किल्ल्यावरील निसर्गरम्य वातावरणाचा आनंद घेतला. शिवाय महंत ज्ञानगिरी बाबा यांच्यासोबत मनसोक्तपणे गप्पा मारून किल्ल्याची माहिती जाणून घेतल्याचीही माहिती मिळत आहे. मात्र यावेळी जानकरांनी मीडिया आणि लोकांना देखील भेटण्याचे टाळले. याबाबत अनेकांना प्रश्न निर्माण होत आहेत.

आता अंकाई किल्ल्यावरचा त्यांचा व्हिडीओ समोर

राष्ट्रीय समाज पक्षाचे अध्यक्ष महादेव जानकर यांनी दुग्धविकास मंत्रिपद भुषवले. पण सत्तेतून पायउतार झाल्यानंतर महादेव जानकर हे मीडियापासून दोन हात दूर राहत आहे. त्यानंतर महादेव जानकर हे भाजपच्या आंदोलनात सहभागी होताना दिसले. अलीकडेच पंकजा मुंडे यांच्यासोबत ते भगवानगडावर हजर होते. त्यानंतर आता अंकाई किल्ल्यावरचा त्यांचा व्हिडीओ समोर आला आहे.